ದೇಶದ ಮೊದಲ ಟ್ರಾನ್ಸ್ ಜೇಂಡರ್ ಗರ್ಭಿಣಿ

ಕೋಯಿಕ್ಕೋಡ್​ : ಕೇರಳದ ತೃತೀಯಲಿಂಗಿ ದಂಪತಿ ಮಗುವಿಗೆ ತಂದೆ ತಾಯಿಯಾಗುತ್ತಿದ್ದಾರೆ. ಇದು ಅಚ್ಚರಿ ಎನಿಸಿದರೂ ಸತ್ಯ! ಕೇರಳದ ಕೋಯಿಕ್ಕೋಡ್​ನ ಡ್ಯಾನ್ಸರ್​ ಜಿಯಾ ಪಾವಲ್​ ಹಾಗೂ ಜಹಾದ್​ ತಾವು ತಂದೆ ತಾಯಿ ಆಗುತ್ತಿರುವ ಸುದ್ದಿಯನ್ನು ಹಂಚಿಕೊಂಡಿದ್ದು, ಜಿಯಾ ಪಾವಲ್​ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಮುಂದಿನ ತಿಂಗಳು ಮಗುವನ್ನು ನಿರೀಕ್ಷಿಸುತ್ತಿರುವುದಾಗಿ ಘೋಷಿಸಿದ್ದಾರೆ. ಇದು ದೇಶದಲ್ಲೇ ಮೊದಲ ತೃತೀಯಲಿಂಗಿ ಗರ್ಭಧಾರಣೆ ಮಾಡಿರುವುದಾಗಿದೆ.

ಸಾಮಾನ್ಯರಂತೆ ಈ ತೃತೀಯಲಿಂಗಿ ದಂಪತಿ ಕೂಡ ವಿಭಿನ್ನವಾಗಿ ಬೇಬಿ ಬಂಪ್​ ಫೋಟೋಶೂಟ್​ ಮಾಡಿಸಿಕೊಂಡಿದ್ದು, ಕೆಲವು ಫೋಟೋಗಳನ್ನು ಇನ್​ಸ್ಟಾಗ್ರಾಂನಲ್ಲಿ ಸೇರ್​ ಮಾಡಿಕೊಂಡು, ತಂದೆ ತಾಯಿಯಾಗುತ್ತಿರುವ ಖುಷಿಯ ವಿಚಾರವನ್ನು ಹಂಚಿಕೊಂಡಿದ್ದಾರೆ.

ಇನ್ನು ನೃತ್ಯಗಾರ್ತಿಯಾಗಿರುವ ಜಿಯಾ ಪಾವಲ್​ ಹಾಗೂ ಜಾಹದ್​ ಕಳೆದ ಮೂರು ವರ್ಷಗಳಿಂದ ಜೊತೆಯಾಗಿ ವಾಸಿಸುತ್ತಿದ್ದಾರೆ.

ಜಿಯಾ ಪಾವಲ್​ ಅವರು ಹುಡುಗನಾಗಿ ಜನಿಸಿದ್ದರು. ಆದರೆ ಬೆಳೆಯುತ್ತ ಮಹಿಳೆಯಾಗಿ ಬದಲಾಗಿದ್ದರು. ಹಾಗೆಯೇ ಜಹಾದ್​ ಹುಡುಗಿಯಾಗಿ ಹುಟ್ಟಿ, ಬೆಳೆಯುತ್ತಾ ಪುರುಷನಾಗಿ ರೂಪಾಂತರಗೊಂಡರು.

ಇಬ್ಬರೂ ತಮ್ಮಲ್ಲಾಗುತ್ತಿದ್ದ ಲಿಂಗ ಪರಿವರ್ತನೆಯನ್ನು ಅರಿತು ತಮ್ಮ ಪ್ರೌಢಾವಸ್ಥೆಯಲ್ಲಿಯೇ ಕುಟುಂಬವನ್ನು ತೊರೆದು ಬಂದಿದ್ದರು. ಹೆರಿಗೆಯ ನಂತರ, ಈಗ ತಾಯಿಯಾಗಿ ಮಗುವನ್ನು ಗರ್ಭದಲ್ಲಿ ಹೊತ್ತಿರುವ ಜಹಾದ್​ ತಂದೆಯಾಗಿ, ಜಿಯಾ ಪಾವಲ್​ ತಾಯಿಯಾಗಿ ಮಗುವನ್ನು ಸಾಕಿ ಸಲುಹಲಿದ್ದಾರೆ.

ನೃತ್ಯಗಾರ್ತಿ ಜಿಯಾ ಪಾವಲ್​ ಇನ್​ಸ್ಟಾಗ್ರಾಂನಲ್ಲಿ ತಮ್ಮ ಜೊತೆಗಾರ ಜಹಾದ್​ ಈಗ ಎಂಟು ತಿಂಗಳ ಗರ್ಭಿಣಿಯಾಗಿದ್ದು, ಮಾರ್ಚ್​ ತಿಂಗಳಿನಲ್ಲಿ ತಮ್ಮ ಮೊದಲ ಮಗುವನ್ನು ನಿರೀಕ್ಷಿಸುತ್ತಿರುವುದಾಗಿ ಹೇಳಿದ್ದಾರೆ.

‘ನನ್ನ ತಾಯಿಯಾಗುವ ಕನಸು ಹಾಗೂ ಅವನು ತಂದೆಯಾಗುವ ಕನಸು ನನಸಾಗುತ್ತಿದೆ. ಎಂಟು ತಿಂಗಳ ಭ್ರೂಣ ಜಹಾದ್​ ಹೊಟ್ಟೆಯಲ್ಲಿ ಬೆಳೆಯುತ್ತಿದೆ. ನನಗೆ ತಿಳಿದ ಮಾಹಿತಿ ಪ್ರಕಾರ ಇದು ಭಾರತದಲ್ಲಿ ಮೊದಲ ತೃತೀಯಲಿಂಗಿ ಗರ್ಭಧಾರಣೆಯಾಗಿದೆ.