ಬೀಡ್: ಮಹಾರಾಷ್ಟ್ರದ ಬೀಡ್ ಜಿಲ್ಲೆಯ ಪಾರ್ಲಿಯಲ್ಲಿ ಅಪರೂಪದ ಹಾಗೂ ವಿಶೇಷ ಸನ್ನಿವೇಶವೊಂದು ನಡೆದಿದೆ. ಸತತ ಐದು ತಲೆಮಾರುಗಳಿಂದ, ಅಂದರೆ ಸುಮಾರು 200 ವರ್ಷಗಳಿಂದ ಹೆಣ್ಣುಮಗುವಿನ ಮುಖವನ್ನೇ ಕಾಣದಿದ್ದ ದಹಿಫಾಲೆ ಕುಟುಂಬದಲ್ಲಿ ಕೊನೆಗೂ ಮಹಾಲಕ್ಷ್ಮಿಯ ಆಗಮನವಾಗಿದೆ.
ರಿಷಿಕೇಶ್‌ ದಹಿಫಾಲೆ ಹಾಗೂ ಕಲ್ಪನಾ ದಹಿಫಾಲೆ ದಂಪತಿಗೆ ಹೆಣ್ಣುಮಗು ಜನಿಸಿದ್ದು, ಮಗುವಿಗೆ 'ಗರ್ಗಿ' ಎಂದು ನಾಮಕರಣ ಮಾಡಲಾಗಿದೆ.
ಈ ಸವಿನೆನಪಿಗಾಗಿ ಕುಟುಂಬಸ್ಥರು ಹಬ್ಬದ ವಾತಾವರಣ ನಿರ್ಮಿಸಿ, ಮಗುವನ್ನು ಅದ್ದೂರಿಯಾಗಿ ಮನೆಗೆ ಬರಮಾಡಿಕೊಂಡಿದ್ದಾರೆ.
ಆಸ್ಪತ್ರೆಯಿಂದ ತಾಯಿ ಮತ್ತು ಮಗು ಬಿಡುಗಡೆಯಾಗುತ್ತಿದ್ದಂತೆ ದಹಿಫಾಲೆ ಕುಟುಂಬಸ್ಥರು ವಿಶೇಷ ಸಮಾರಂಭವನ್ನು ಆಯೋಜಿಸಿದ್ದರು. ಸುಂದರವಾಗಿ ಹೂವುಗಳಿಂದ ಅಲಂಕರಿಸಿದ್ದ ಸಾರೋಟಿನಲ್ಲಿ ತಾಯಿ ಕಲ್ಪನಾ ಮತ್ತು ನವಜಾತ ಶಿಶು ಗರ್ಗಿಯನ್ನು ಕೂರಿಸಿ, ವಾದ್ಯ-ಮೇಳಗಳ ನಾದದೊಂದಿಗೆ ಗ್ರಾಮದ ಬೀದಿಗಳಲ್ಲಿ ವಿಜೃಂಭಣೆಯ ಮೆರವಣಿಗೆ ನಡೆಸಲಾಯಿತು.
ತಮ್ಮ ಮನೆತನಕ್ಕೆ ಸುದೀರ್ಘ ಕಾಲದ ನಂತರ ಕಾಲಿಟ್ಟ 'ರಾಜಕುಮಾರಿ'ಗೆ ಕುಟುಂಬಸ್ಥರು ನೀಡಿದ ಈ ರಾಜೋಪಚಾರ ಮತ್ತು ಆಚರಣೆಯನ್ನು ಕಂಡು ಇಡೀ ಗ್ರಾಮಸ್ಥರೇ ಸಂಭ್ರಮದಲ್ಲಿ ಭಾಗಿಯಾಗಿ ಹಾರೈಸಿದರು.
