ಮುಂಬೈ: ಮದ್ಯಪ್ರಿಯರ ನೆಚ್ಚಿನ ರಮ್ ಬ್ರ್ಯಾಂಡ್ 'ಓಲ್ಡ್ ಮಾಂಕ್' (Old Monk) ಬಾಟಲಿಯ ಮೇಲಿರುವ ಲೇಬಲ್ ಶೀಘ್ರದಲ್ಲೇ ಬದಲಾಗಲಿದೆ. ಮುಂಬೈ ಹೈಕೋರ್ಟ್ನಲ್ಲಿ(Mumbai High Court) ನಡೆದ ವಿಚಾರಣೆ ವೇಳೆ, ಕಂಪನಿಯು ತನ್ನ ಬಾಟಲಿಗಳ ಮೇಲಿರುವ "7 ಇಯರ್ಸ್ ಓಲ್ಡ್ ಬ್ಲೆಂಡೆಡ್" (7 ವರ್ಷಗಳ ಹಳೆಯ ಬ್ಲೆಂಡೆಡ್) ಎಂಬ ಬರಹವನ್ನು ತೆಗೆದುಹಾಕಲು ಹಾಗೂ ಸೇರಿಸಲಾದ ಕೃತಕ ಸುವಾಸನೆಯ (Added Flavours) ಮಾಹಿತಿಯನ್ನು ಸ್ಪಷ್ಟವಾಗಿ ನಮೂದಿಸಲು ಒಪ್ಪಿಕೊಂಡಿದೆ.
ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (FSSAI) ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಹೈಕೋರ್ಟ್ನ ಹಿರಿಯ ನ್ಯಾಯಮೂರ್ತಿ ರವೀಂದ್ರ ವಿ. ಘುಗೆ ಅವರಿದ್ದ ಪೀಠವು, ಕಂಪನಿಯ ಲೇಬಲಿಂಗ್ ವಿಧಾನವನ್ನು ತೀವ್ರವಾಗಿ ಖಂಡಿಸಿದೆ. "7 ವರ್ಷ ಹಳೆಯದ್ದು ಎಂದರೆ 7 ವರ್ಷ ಹಳೆಯದೇ ಇರಬೇಕು. ಈ ರೀತಿಯ ಬರಹ ಗ್ರಾಹಕರನ್ನು ತಪ್ಪುದಾರಿಗೆ ಎಳೆಯುತ್ತದೆ," ಎಂದು ಕೋರ್ಟ್ ಗರಂ ಆಯಿತು.
ಇದಷ್ಟೇ ಅಲ್ಲದೆ, ಬಾಟಲಿಯ ಮೇಲಿರುವ ಕೃತಕ ಸುವಾಸನೆಗಳ ಮಾಹಿತಿಯನ್ನು ಅತ್ಯಂತ ಸಣ್ಣ ಅಕ್ಷರಗಳಲ್ಲಿ ಮುದ್ರಿಸಿರುವುದಕ್ಕೂ ನ್ಯಾಯಾಲಯ ಅಸಮಾಧಾನ ವ್ಯಕ್ತಪಡಿಸಿತು.
