ಬಹುನಿರೀಕ್ಷಿತ ‘ಸಿಕಂದರ್’, ಇದೇ ಭಾನುವಾರ ತೆರೆಗಪ್ಪಳಿಸಲಿದೆ. ಇದೇ ಮೊದಲ ಬಾರಿ, ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಹಾಗೂ ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಸ್ಕ್ರೀನ್ ಶೇರ್ ಮಾಡಿದ್ದಾರೆ. ಸಿನಿಮಾ ಘೋಷಣೆಯಾದಾಗಿನಿಂದಲೂ ಹಲವು ವಿಚಾರಗಳಿಂದ ಸಖತ್ ಸದ್ದು ಮಾಡುತ್ತಾ ಬಂದಿದೆ. ಮುಖ್ಯಭೂಮಿಕೆಯಲ್ಲಿರುವ ನಟ ನಟಿಯ ವಯಸ್ಸಿನ ಅಂತರ ಕೂಡಾ ನೆಟ್ಟಿಗರ ಚರ್ಚೆಯ ವಿಷಯಗಳಲ್ಲೊಂದಾಗಿದೆ. ಅದಕ್ಕೀಗ ಸ್ವತಃ ನಾಯಕ ನಟನೇ ಪ್ರತಿಕ್ರಿಯಿಸಿದ್ದಾರೆ.
‘ಸಿಕಂದರ್’ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿದೆ. ಟ್ರೇಲರ್‌ಗೆ ಅಭಿಮಾನಿಗಳಿಂದ ಬಹುತೇಕ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಟ್ರೇಲರ್ ರಿಲೀಸ್ ಈವೆಂಟ್ನಲ್ಲಿ, ಸಲ್ಮಾನ್ ಖಾನ್ ಮಾಧ್ಯಮದ ಹಲವು ಪ್ರಶ್ನೆಗಳಿಗೆ ಉತ್ತರಿಸಿದರು. ಈ ಸಂದರ್ಭ, ತಮ್ಮ ಮತ್ತು ರಶ್ಮಿಕಾ ಮಂದಣ್ಣ ನಡುವಿನ ಏಜ್ ಡಿಫ್ರೆನ್ಸ್ ಬಗ್ಗೆಯೂ ಮಾತನಾಡಿದ್ದಾರೆ.
ಸಲ್ಮಾನ್ ಪ್ರಶ್ನೆಗೆ ನಾಚಿ ನೀರಾದ ರಶ್ಮಿಕಾ: 31 ವರ್ಷ ಏಜ್ ಗ್ಯಾಪ್ ಇದ್ದು, ಚಿತ್ರದಲ್ಲಿ ರೊಮ್ಯಾನ್ಸ್ ಮಾಡಿರುವ ಬಗ್ಗೆ ಸಿಕ್ಕಾಪಟ್ಟೆ ಟ್ರೋಲ್ಗಳಾಗಿವೆ. ಈ ಬಗ್ಗೆ ಮಾತನಾಡುತ್ತಾ, ‘ನಾಯಕಿಗೆ ಯಾವುದೇ ಸಮಸ್ಯೆ ಇಲ್ಲ, ನಾಯಕಿಯ ತಂದೆಗೆ ಯಾವುದೇ ಸಮಸ್ಯೆ ಇಲ್ಲ ಅಂದ ಮೇಲೆ ನಿಮಗೇಕೆ ಸಮಸ್ಯೆ’ ಎಂದು ಸಲ್ಮಾನ್ ಪ್ರಶ್ನಿಸಿದರು. ರಶ್ಮಿಕಾ ಅವರ ಮದುವೆ ಆಗುತ್ತೆ, ಹೆಣ್ಣು ಮಗು ಜನಿಸುತ್ತದೆ, ಅವರು ದೊಡ್ಡವರಾದ ಮೇಲೆ ಅವರೊಂದಿಗೂ ಕೆಲಸ ಮಾಡುತ್ತೇನೆ. ತಾಯಿಯ ಅನುಮತಿ ಸಿಗುತ್ತಲ್ವಾ? ಎಂದು ರಶ್ಮಿಕಾ ಬಳಿ ನೋಡಿ ಪ್ರಶ್ನಿಸಿದಾಗ ನಟಿ ನಾಚಿ ನೀರಾದರು. ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಸದ್ದು ಮಾಡುತ್ತಿದೆ.
