ಪ್ರಯಾಗ್ರಾಜ್: ಕುಟುಂಬ ವ್ಯವಸ್ಥೆ ಮತ್ತು ನಿರ್ವಹಣಾ ವೆಚ್ಚಕ್ಕೆ ಸಂಬಂಧಿಸಿದಂತೆ ಅಲಹಾಬಾದ್ ಹೈಕೋರ್ಟ್ ಮಹತ್ವದ ತೀರ್ಪೊಂದನ್ನು ನೀಡಿದೆ.
ಕ್ರಿಮಿನಲ್ ಪ್ರಕ್ರಿಯಾ ಸಂಹಿತೆಯ (CrPC) ಸೆಕ್ಷನ್ 125 ರ ಅಡಿಯಲ್ಲಿ (ಈಗಿನ ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ – BNSS ನ ಸೆಕ್ಷನ್ 144), ಸೊಸೆಯು ತನ್ನ ಅತ್ತೆ-ಮಾವಂದಿರಿಗೆ ಜೀವನನಾಂಶ ಅಥವಾ ನಿರ್ವಹಣಾ ವೆಚ್ಚವನ್ನು ನೀಡಲು ಕಾನೂನುಬದ್ಧವಾಗಿ ಬದ್ಧಳಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
ಪ್ರಕರಣದ ಹಿನ್ನೆಲೆ:
ಕೇಸ್ವೊಂದರಲ್ಲಿ ಅತ್ತೆಯೊಬ್ಬರು ತನ್ನ ಮೃತ ಮಗನ ಪತ್ನಿಯಿಂದ (ಸೊಸೆ) ಮಾಸಿಕ ನಿರ್ವಹಣಾ ವೆಚ್ಚವನ್ನು ಕೊಡಿಸಬೇಕೆಂದು ಕೋರ್ಟ್ ಮೊರೆ ಹೋಗಿದ್ದರು.
ಈ ಅರ್ಜಿಯನ್ನು ವಿಚಾರಣೆ ನಡೆಸಿದ ಕೆಳಹಂತದ ನ್ಯಾಯಾಲಯವು ಅತ್ತೆಗೆ ಪರವಾಗಿ ತೀರ್ಪು ನೀಡಿತ್ತು. ಇದನ್ನು ಪ್ರಶ್ನಿಸಿ ಸೊಸೆಯು ಹೈಕೋರ್ಟ್ನಲ್ಲಿ ಮೇಲ್ಮನವಿ ಸಲ್ಲಿಸಿದ್ದರು.
ನ್ಯಾಯಾಲಯದ ಪ್ರಮುಖ ಅಂಶಗಳು:
ಕಾನೂನಿನ ವ್ಯಾಪ್ತಿ: CrPC ಸೆಕ್ಷನ್ 125 ರ ಅನ್ವಯ, ಪತ್ನಿ, ಮಕ್ಕಳು ಮತ್ತು ಪೋಷಕರು (ತಂದೆ-ತಾಯಿ) ಮಾತ್ರ ನಿರ್ವಹಣಾ ವೆಚ್ಚವನ್ನು ಪಡೆಯಲು ಅರ್ಹರಾಗಿರುತ್ತಾರೆ.
ಸೊಸೆಯ ಜವಾಬ್ದಾರಿ: ಅಳಿಯ ಅಥವಾ ಸೊಸೆಯು ಅತ್ತೆ-ಮಾವಂದಿರನ್ನು ಸಾಕುವುದು ನೈತಿಕವಾಗಿ ಸರಿ ಇರಬಹುದು, ಆದರೆ ಕಾನೂನುಬದ್ಧವಾಗಿ ಅದನ್ನು ಕಡ್ಡಾಯಗೊಳಿಸಲು ಸಾಧ್ಯವಿಲ್ಲ.”ಪೋಷಕರು” ಎಂಬ ಪದದ ಅಡಿಯಲ್ಲಿ ಕೇವಲ ಸ್ವಂತ ತಂದೆ-ತಾಯಿ ಅಥವಾ ದತ್ತು ಪಡೆದ ಪೋಷಕರು ಬರುತ್ತಾರೆಯೇ ಹೊರತು, ಅತ್ತೆ-ಮಾವಂದಿರು ಈ ವ್ಯಾಪ್ತಿಗೆ ಬರುವುದಿಲ್ಲ ಎಂದು ನ್ಯಾಯಮೂರ್ತಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಈ ತೀರ್ಪಿನ ಮೂಲಕ ಹೈಕೋರ್ಟ್ ಈ ಹಿಂದೆ ಕೆಳಹಂತದ ನ್ಯಾಯಾಲಯ ನೀಡಿದ್ದ ಆದೇಶವನ್ನು ರದ್ದುಗೊಳಿಸಿದೆ. ಪತಿ ಮೃತಪಟ್ಟಿದ್ದರೂ ಸಹ, ಆತನ ಆಸ್ತಿಯಲ್ಲಿ ಸೊಸೆಯು ಪಾಲನ್ನು ಹೊಂದಿದ್ದರೂ ಸಹ, ಆಕೆ ತನ್ನ ವೈಯಕ್ತಿಕ ಆದಾಯದಿಂದ ಅತ್ತೆ-ಮಾವಂದಿರನ್ನು ಸಲಹಬೇಕು ಎಂದು ಕಾನೂನು ಒತ್ತಾಯಿಸುವಂತಿಲ್ಲ ಎಂದು ಕೋರ್ಟ್ ಹೇಳಿದೆ.
https://www.youtube.com/@BVNEWS5/videos