ಬೆಂಗಳೂರು: ಭಾರಿ ಬಿಸಿಲು ಮತ್ತು ಸಾಲು ಸಾಲು ಹಬ್ಬಗಳ ಹಿನ್ನೆಲೆಯಲ್ಲಿ ಕೆಎಂಎಫ್ ನಂದಿನಿ ಹಾಲು ಮತ್ತು ಮೊಸರು ಇತಿಹಾಸದಲ್ಲೇ ದಾಖಲೆ ಮಟ್ಟದಲ್ಲಿ ಮಾರಾಟವಾಗಿದೆ.
ಏಪ್ರಿಲ್ 6ರಂದು ಒಂದೇ ದಿನ 13.56 ಲಕ್ಷ ಸ್ಯಾಚೆಟ್ ಮೊಸರು ಮಾರಾಟವಾಗಿದೆ. ಅದೇ ರೀತಿ ಏಪ್ರಿಲ್ 11 ರಂದು 51.60 ಲಕ್ಷ ಲೀಟರ್ ಸ್ಯಾಚೆಟ್ ಹಾಲು ಮಾರಾಟವಾಗಿದ್ದು, ಇದು ಕೆಎಂಎಫ್ ಇತಿಹಾಸದಲ್ಲಿ ಇದುವರೆಗೂ ಒಂದೇ ದಿನದಲ್ಲಿ ಹಾಲು ಮೊಸರಿನ ಅತ್ಯಧಿಕ ಮಾರಾಟದ ದಾಖಲೆಯಾಗಿದೆ.
ಪ್ರಸ್ತುತ ಹಾಲು ಮಾರಾಟದ ಬೆಳವಣಿಗೆ ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡ 10ರಷ್ಟು ಹೆಚ್ಚಳವಾಗಿದೆ. ಮೊಸರು ಮಾರಾಟದಲ್ಲಿ ಶೇಕಡ 22ರಷ್ಟು ಹೆಚ್ಚಳವಾಗಿದ್ದು, ಮಜ್ಜಿಗೆ ಮತ್ತು ಲಸ್ಸಿ ಉತ್ಪನ್ನಗಳಿಗೂ ಹೆಚ್ಚಿನ ಬೇಡಿಕೆ ಇದೆ. ಪ್ರತಿದಿನ 25,439 ಲೀಟರ್ ಐಸ್ ಕ್ರೀಮ್ ಮಾರಾಟ ಮಾಡುವ ಮೂಲಕ ಕೆಎಮ್‌ಎಫ್ ದಾಖಲೆ ನಿರ್ಮಿಸಿದೆ.
