ಮೇಲಿನ ಫೋಟೋದಲ್ಲಿ ನೀವು ನೋಡುತ್ತಿರುವ ವ್ಯಕ್ತಿಯ ಹೆಸರು ಅಮೀನ್ ಅಹ್ಮದ್ ಅನ್ಸಾರಿ. ಇವರು ಚಂದ್ರಾಯನಗುಟ್ಟದ ಶಾಹಿನಗರದ ನಿವಾಸಿ. ಇವರ ತಂದೆ ಹೈದರಾಬಾದ್ನ ಕಾಚಿಗುಡ ಡಿಪೋದಲ್ಲಿ ಹೆಡ್ ಕಾನ್ಸ್ಟೆಬಲ್ ಆಗಿ ಕೆಲಸ ಮಾಡುತ್ತಿದ್ದರು. 2021ರಲ್ಲಿ ಅನಾರೋಗ್ಯದ ಕಾರಣದಿಂದ ಅವರು ನಿಧನರಾದರು. ಅನುಕಂಪದ ನೇಮಕಾತಿಯಡಿಯಲ್ಲಿ ಇಂಟರ್ (ಪಿಯುಸಿ) ಪೂರ್ಣಗೊಳಿಸಿದ ಅನ್ಸಾರಿ ಅವರಿಗೆ ಮೆಹದಿಪಟ್ನಂ ಆರ್ಟಿಸಿ ಡಿಪೋದಲ್ಲಿ ಕಂಡಕ್ಟರ್ ಕೆಲಸ ಸಿಕ್ಕಿತು. ಅನ್ಸಾರಿ ಅವರಿಗೆ ಕೆಲಸ ಸಿಕ್ಕಿದ ಖುಷಿ ಒಂದೆಡೆಯಾದರೆ, 7 ಅಡಿ ಎತ್ತರದಿಂದಾಗಿ ಕರ್ತವ್ಯ ನಿರ್ವಹಿಸುವುದು ಒಂದು ಸವಾಲೇ ಆಗಿಹೋಯಿತು.
"ದಯವಿಟ್ಟು ನನಗೆ ಬೇರೆ ಕೆಲಸ ಕೊಡಿ": ನಾನು ದಿನಕ್ಕೆ ಸರಾಸರಿ 5 ಟ್ರಿಪ್ಗಳಂತೆ 10 ಗಂಟೆಗಳ ಕಾಲ ಬಸ್ಗಳಲ್ಲಿ ಪ್ರಯಾಣಿಸಬೇಕು. ಈ ಬಸ್ಸು 214 ಸೆಂ.ಮೀ ಅಗಲ ಮತ್ತು 195 ಸೆಂ.ಮೀ (6 ಅಡಿ 4 ಇಂಚು) ಎತ್ತರವಿದೆ. ನಾನು ಅದಕ್ಕಿಂತ ಎತ್ತರವಾಗಿರುವುದರಿಂದ ಮತ್ತು ಗಂಟೆಗಟ್ಟಲೆ ತಲೆ ಬಾಗಿಸಿ ಪ್ರಯಾಣಿಸುವುದರಿಂದ ಕುತ್ತಿಗೆ ಮತ್ತು ಬೆನ್ನು ನೋವು, ನಿದ್ರಾಹೀನತೆಯಿಂದ ಆಸ್ಪತ್ರೆಗಳಿಗೆ ಓಡಾಡಬೇಕಾಗಿದೆ ಎಂದು ಅನ್ಸಾರಿ ತಾವು ಅನುಭವಿಸುತ್ತಿರುವ ಸಮಸ್ಯೆ ಬಗ್ಗೆ ಹೇಳಿಕೊಂಡಿದ್ದಾರೆ. ಇದರ ಜೊತೆಗೆ, ಉನ್ನತ ಅಧಿಕಾರಿಗಳು ಸ್ಪಂದಿಸಿ ಅವರಿಗೆ ಆರ್ಟಿಸಿಯಲ್ಲಿ ಬೇರೆ ಕೆಲಸ ನೀಡುವಂತೆ ಪ್ರಯಾಣಿಕರು ಮನವಿ ಮಾಡುತ್ತಿದ್ದಾರೆ.
