ಲಖನೌ: ಉತ್ತರ ಪ್ರದೇಶದ ಲಖನೌನಲ್ಲಿ ಅತಿಥಿಗೃಹವೊಂದರ ಕೊಠಡಿಯಲ್ಲಿ 22 ವರ್ಷದ ಯುವಕ ಹಾಗೂ 19 ವರ್ಷದ ಯುವತಿ ಶವವಾಗಿ ಪತ್ತೆಯಾಗಿದ್ದಾರೆ.
ಮೃತರನ್ನು ಅಮಿತ್ ಕುಮಾರ್ (22) ಮತ್ತು ನರ್ಗಿಸ್ (19) ಎಂದು ಪೊಲೀಸರು ಗುರುತಿಸಿದ್ದಾರೆ. ಇಬ್ಬರೂ ಕಳೆದ ಸುಮಾರು 20 ದಿನಗಳಿಂದ ಚಿನ್ಹಟ್ ಪೊಲೀಸ್ ಠಾಣಾ ವ್ಯಾಪ್ತಿಯ ರೆಡ್ ಬಿಲ್ಡಿಂಗ್ ಗೆಸ್ಟ್ಹೌಸ್ನ 101ನೇ ಕೊಠಡಿಯಲ್ಲಿ ವಾಸವಾಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಬುಧವಾರ ರಾತ್ರಿ ಅತಿಥಿಗೃಹದ ನಿರ್ವಾಹಕ ರಾಕೇಶ್ ಯಾದವ್ ಪೊಲೀಸರಿಗೆ ಕರೆ ಮಾಡಿ ಕೊಠಡಿಯಲ್ಲಿ ವಾಸಿಸುತ್ತಿದ್ದ ಯುವಕ ಮತ್ತು ಯುವತಿ ನೇಣು ಬಿಗಿದುಕೊಂಡಿರುವುದಾಗಿ ಮಾಹಿತಿ ನೀಡಿದ್ದಾರೆ. ಮಾಹಿತಿ ಸಿಕ್ಕ ತಕ್ಷಣ ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದಾರೆ.
ಪೊಲೀಸರ ಪ್ರಕಾರ, ಇಬ್ಬರೂ ಸೀಲಿಂಗ್ ಫ್ಯಾನ್ನ ಕೊಕ್ಕಿಗೆ ದುಪಟ್ಟಾ ಬಳಸಿ ನೇಣು ಬಿಗಿದುಕೊಂಡಿದ್ದರು. ಪೊಲೀಸರು ಮೃತದೇಹಗಳನ್ನು ಕೆಳಗಿಳಿಸಿ, ಪಂಚನಾಮೆ ಪ್ರಕ್ರಿಯೆ ಪೂರ್ಣಗೊಳಿಸಿದ ಬಳಿಕ ಲೋಹಿಯಾ ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ.
ಕೊಠಡಿಯಲ್ಲಿ ಪರಿಶೀಲನೆ ನಡೆಸಿದ ವೇಳೆ ಪೊಲೀಸರು ಆರ್ಯ ಸಮಾಜ ಮಂದಿರದಿಂದ ನೀಡಲಾಗಿದ್ದ ವಿವಾಹ ಪ್ರಮಾಣಪತ್ರವನ್ನು ವಶಪಡಿಸಿಕೊಂಡಿದ್ದಾರೆ. ಪ್ರಮಾಣಪತ್ರದ ಪ್ರಕಾರ ಅಮಿತ್ ಕುಮಾರ್ ಮತ್ತು ನರ್ಗಿಸ್ ವಿವಾಹವಾಗಿದ್ದರು.
ದಾಖಲೆಯಲ್ಲಿ ನರ್ಗಿಸ್ ಅವರ ಹೆಸರನ್ನು ನರ್ಗಿಸ್ ಅಲಿಯಾಸ್ ಪೂಜಾ ಎಂದು ನಮೂದಿಸಲಾಗಿದೆ. ಇಬ್ಬರೂ ಲಖನೌಗೆ ಬಂದು ಅತಿಥಿಗೃಹದಲ್ಲಿ ಸುಮಾರು 20 ದಿನಗಳ ಕಾಲ ಉಳಿದಿದ್ದೇಕೆ ಎಂಬುದರ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
