ಶಿಲ್ಲಾಂಗ್: ಮೇಘಾಲಯದ ಪ್ರವಾಸದ ವೇಳೆ ಪತಿಯನ್ನು ಹತ್ಯೆಗೈದ ಪ್ರಕರಣದ ಪ್ರಮುಖ ಆರೋಪಿ ಸೋನಮ್ ರಘುವಂಶಿಗೆ ಇಲ್ಲಿನ ನ್ಯಾಯಾಲಯವು ಜಾಮೀನು ನೀಡಿದೆ.
ಬಂಧನದ ವೇಳೆ ಪೊಲೀಸರು ಕಾನೂನು ಪ್ರಕ್ರಿಯೆಗಳನ್ನು ಸರಿಯಾಗಿ ಪಾಲಿಸದ ಕಾರಣಕ್ಕಾಗಿ ನ್ಯಾಯಾಲಯ ಈ ನಿರ್ಧಾರ ಕೈಗೊಂಡಿದೆ.
ಶಿಲ್ಲಾಂಗ್ನ ಹೆಚ್ಚುವರಿ ಜಿಲ್ಲಾಧಿಕಾರಿ (ನ್ಯಾಯಾಂಗ) ದಶಲೀನ್ ಆರ್. ಖರ್ಬ್ಟೆಂಗ್ ಅವರು ಸೋನಮ್ಗೆ ಜಾಮೀನು ನೀಡುವಾಗ ಪೊಲೀಸರ ತಪ್ಪುಗಳನ್ನು ಎತ್ತಿ ತೋರಿಸಿದ್ದಾರೆ:
ಆರೋಪಿಯನ್ನು ಬಂಧಿಸುವಾಗ ಬಂಧನಕ್ಕೆ ಸರಿಯಾದ ಕಾರಣಗಳನ್ನು (Grounds of Arrest) ಲಿಖಿತವಾಗಿ ಅಥವಾ ಪರಿಣಾಮಕಾರಿಯಾಗಿ ತಿಳಿಸಿಲ್ಲ.
ಬಂಧನದ ದಾಖಲೆಗಳಲ್ಲಿ ಪೊಲೀಸರು ತಪ್ಪಾದ ಕಾನೂನು ಸೆಕ್ಷನ್ಗಳನ್ನು (BNS ಸೆಕ್ಷನ್ 403 ಬದಲಿಗೆ 103 ಇರಬೇಕಿತ್ತು) ನಮೂದಿಸಿದ್ದಾರೆ. ಇದು ಆರೋಪಿಯ ಹಕ್ಕಿನ ಉಲ್ಲಂಘನೆಯಾಗಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ಆರಂಭಿಕ ಹಂತದಲ್ಲಿ ಆರೋಪಿಗೆ ಸರಿಯಾದ ಕಾನೂನು ಸಲಹೆಗಾರರ ನೆರವು ಸಿಕ್ಕಿಲ್ಲ ಎಂಬ ಅಂಶವನ್ನೂ ನ್ಯಾಯಾಲಯ ಗಮನಿಸಿದೆ.
2025ರ ಮೇ ತಿಂಗಳಲ್ಲಿ ಇಂದೋರ್ ಮೂಲದ ಉದ್ಯಮಿ ರಾಜಾ ರಘುವಂಶಿ ಮತ್ತು ಅವರ ಪತ್ನಿ ಸೋನಮ್ ರಘುವಂಶಿ ಮದುವೆಯಾದ ಕೆಲವೇ ದಿನಗಳಲ್ಲಿ ಮೇಘಾಲಯಕ್ಕೆ ಹನಿಮೂನ್ಗೆ ತೆರಳಿದ್ದರು.ಮೇ 23 ರಂದು ದಂಪತಿಗಳು ನಾಪತ್ತೆಯಾಗಿದ್ದರು.
ಶವ ಪತ್ತೆ: ಹತ್ತು ದಿನಗಳ ನಂತರ ರಾಜಾ ರಘುವಂಶಿ ಅವರ ಮೃತದೇಹವು ಸೋಹ್ರಾ (ಚೆರಾಪುಂಜಿ) ಸಮೀಪದ ಕಂದಕವೊಂದರಲ್ಲಿ ಪತ್ತೆಯಾಗಿತ್ತು.ತನ್ನ ಪ್ರಿಯಕರನೊಂದಿಗೆ ಸೇರಿ ಪತಿಯನ್ನು ಹತ್ಯೆ ಮಾಡಲು ಸೋನಮ್ ಸುಪಾರಿ ನೀಡಿದ್ದಾಳೆ ಎಂದು ಪೊಲೀಸರು ಆರೋಪಿಸಿ ಆಕೆಯನ್ನು ಬಂಧಿಸಿದ್ದರು.
