ಕರ್ನೂಲು : ಆಂಧ್ರಪ್ರದೇಶದ ಕರ್ನೂಲು ಜಿಲ್ಲೆಯ ಹೊಳಗುಂದ ಮಂಡಲದ ದೇವರಗಟ್ಟು ಬೆಟ್ಟದ ಮೇಲೆ ದಸರಾ ಮರುದಿನ ನಡೆಯುವ ಸಾಂಪ್ರದಾಯಿಕ ಬನ್ನಿ ಉತ್ಸವದಲ್ಲಿ (Banni Festival) ಆಘಾತಕಾರಿ (Shocking) ದುರಂತ ಸಂಭವಿಸಿದೆ.
ಶತಮಾನಗಳಿಂದ ನಡೆದುಕೊಂಡು ಬಂದಿರುವ ಆಚಾರದ ಹೆಸರಿನಲ್ಲಿ ನಡೆದ ಈ ದೊಣ್ಣೆಗಳ ಕಾಳಗದಲ್ಲಿ (ಕರ್ರಲ ಸಮರ) ತಲೆಗಳು ಒಡೆದು, ರಕ್ತ ಸುರಿದರೂ ಭಕ್ತರು ಕಿಂಚಿತ್ತೂ ಹಿಂದೆ ಸರಿಯಲಿಲ್ಲ. ಮಾಳ ಮಲ್ಲೇಶ್ವರ ಸ್ವಾಮಿಯ ಕಲ್ಯಾಣೋತ್ಸವದ ನಂತರ ಉತ್ಸವ ಮೂರ್ತಿಗಳನ್ನು ಬೆಟ್ಟದ ಮೇಲಿಂದ ಕೆಳಗಿರುವ ಸಿಂಹಾಸನ ಕಟ್ಟೆಗೆ ತರಲಾಯಿತು.
ಅಲ್ಲಿ ವಿಶೇಷ ಪೂಜೆಗಳು ಮುಗಿಯುತ್ತಿದ್ದಂತೆ, ವಿಗ್ರಹಗಳನ್ನು ವಶಪಡಿಸಿಕೊಳ್ಳಲು ಸುತ್ತಮುತ್ತಲಿನ 11 ಹಳ್ಳಿಗಳ ಜನರು ದೊಣ್ಣೆಗಳು ಮತ್ತು ಪಂಜುಗಳನ್ನು ಹಿಡಿದು ಭೀಕರವಾಗಿ ಮುಗಿಬಿದ್ದರು.
ಅರ್ಧರಾತ್ರಿಯ ಬಳಿಕ ಭುಗಿಲೆದ್ದ ಹಿಂಸಾಚಾರ
ಅರ್ಧರಾತ್ರಿ ದಾಟಿದ ನಂತರ ಉತ್ಸವ ಮೂರ್ತಿಗಳ ಮೆರವಣಿಗೆ ಆರಂಭವಾಗುತ್ತಿದ್ದಂತೆ ಪರಿಸ್ಥಿತಿ ತೀವ್ರ ಸ್ವರೂಪ ಪಡೆದುಕೊಂಡಿತು. ಪರಸ್ಪರ ಬಡಿದಾಡಿಕೊಂಡ ಪರಿಣಾಮ ಆಲೂರು ಮೂಲದ ಪೋತುರಾಜು ಎಂಬ ವ್ಯಕ್ತಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ನೂರಕ್ಕೂ ಹೆಚ್ಚು ಭಕ್ತರು ಗಂಭೀರವಾಗಿ ಗಾಯಗೊಂಡಿದ್ದು, ಅವರಲ್ಲಿ ಐವರ ಸ್ಥಿತಿ ಚಿಂತಾಜನಕವಾಗಿದೆ.
ಗಾಯಾಳುಗಳನ್ನು ತಕ್ಷಣವೇ ಆಲೂರಿನ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಈ ಐತಿಹಾಸಿಕ ಉತ್ಸವವನ್ನು ಕಣ್ತುಂಬಿಕೊಳ್ಳಲು ಆಂಧ್ರಪ್ರದೇಶ ಮಾತ್ರವಲ್ಲದೆ ಕರ್ನಾಟಕ, ತೆಲಂಗಾಣ ಮತ್ತು ಮಹಾರಾಷ್ಟ್ರಗಳಿಂದಲೂ ಲಕ್ಷಾಂತರ ಭಕ್ತರು ದೇವರಗಟ್ಟು ಬೆಟ್ಟಕ್ಕೆ ಧಾವಿಸಿದ್ದರು.
