ವಿಜಯಪುರ: ಐತಿಹಾಸಿಕ ನಗರಿ ವಿಜಯಪುರದಲ್ಲಿ ಜರುಗಿದ ಪ್ರಸಿದ್ಧ ಶ್ರೀ ದುರ್ಗಾದೇವಿ ಜಾತ್ರಾ ಮಹೋತ್ಸವದಲ್ಲಿ ಈ ಬಾರಿ ಬಾಲಿವುಡ್ನ (Bollywood) ಹಿರಿಯ ನಟ ಹಾಗೂ 'ಹೀರೋ ನಂಬರ್ ಒನ್' ಖ್ಯಾತಿಯ ಗೋವಿಂದ (Actor Govinda) ಅವರ ಭರ್ಜರಿ ನೃತ್ಯ ಹೊಸ ಕಳೆ ತಂದಿದೆ.
ಭಕ್ತಿ ಮತ್ತು ಸಂಭ್ರಮದ ವಾತಾವರಣದಲ್ಲಿದ್ದ ಜಾತ್ರಾ ಮಹೋತ್ಸವಕ್ಕೆ ಆಗಮಿಸಿದ ನಟ ಗೋವಿಂದ ಅವರನ್ನು ನೋಡಲು ಹರಿದುಬಂದಿದ್ದ ಸಹಸ್ರಾರು ಅಭಿಮಾನಿಗಳಿಗೆ ಈ ಕಾರ್ಯಕ್ರಮ ಮರೆಯಲಾಗದ ರಸದೌತಣ ನೀಡಿತು.
ವೇದಿಕೆಯ ಮೇಲೆ ಸದಾ ಉತ್ಸಾಹದಿಂದ ಕಾಣಿಸಿಕೊಳ್ಳುವ ಗೋವಿಂದ ಅವರು, ಸೂಪರ್ ಹಿಟ್ ಹಾಡುಗಳಿಗೆ ಅದ್ಭುತವಾಗಿ ಹೆಜ್ಜೆ ಹಾಕುವ ಮೂಲಕ ಇಡೀ ವಿಜಯಪುರದ ಜನತೆಯ ಮನ ಗೆದ್ದಿದ್ದಾರೆ.
ಜಾತ್ರಾ ಸಮಿತಿಯ ವಿಶೇಷ ಆಹ್ವಾನದ ಮೇರೆಗೆ ಆಗಮಿಸಿದ್ದ ಗೋವಿಂದ ಅವರನ್ನು ಅತ್ಯಂತ ಅದ್ಧೂರಿಯಾಗಿ ಬರಮಾಡಿಕೊಳ್ಳಲಾಯಿತು. ವೇದಿಕೆ ಹತ್ತುತ್ತಿದ್ದಂತೆ ನೆರೆದಿದ್ದ ಬೃಹತ್ ಜನಸ್ತೋಮದ ಹರ್ಷೋದ್ಗಾರ ಮತ್ತು ಸೀಟಿಗಳು ಮುಗಿಲು ಮುಟ್ಟುವಂತೆ ಮಾಡಿದವು.
ಉತ್ತರ ಕರ್ನಾಟಕದ ಜನರ ಪ್ರೀತಿ ಮತ್ತು ಭಕ್ತಿಗೆ ಮನಸೋತ ಬಾಲಿವುಡ್ ನಟ, ತಮ್ಮದೇ ವಿಶಿಷ್ಟ ಶೈಲಿಯ ಎಕ್ಸ್ಪ್ರೆಶನ್ಗಳ ಮೂಲಕ ಜನರನ್ನು ರಂಜಿಸಿದರು. ಅವರ ನೃತ್ಯವನ್ನು ಮೊಬೈಲ್ ಕ್ಯಾಮೆರಾಗಳಲ್ಲಿ ಸೆರೆಹಿಡಿಯಲು ಯುವಕರು ಮುಗಿಬಿದ್ದಿದ್ದರು.
ಜಾತ್ರೆಯ ಭಕ್ತಿ ಪ್ರಧಾನ ಸಂಭ್ರಮಕ್ಕೆ ಈ ಬಾಲಿವುಡ್ ನಟನ ಎಂಟ್ರಿ ಮತ್ತು ಅಪ್ರತಿಮ ಡ್ಯಾನ್ಸ್ ಅತ್ಯಂತ ರೋಮಾಂಚಕ ಮೆರುಗು ನೀಡಿದ್ದು, ಈ ವರ್ಷದ ವಿಜಯಪುರ ದುರ್ಗಾದೇವಿ ಜಾತ್ರೆಯನ್ನು ಜನರ ಮನದಲ್ಲಿ ದೀರ್ಘಕಾಲ ನೆನಪಿನಲ್ಲಿ ಉಳಿಯುವಂತೆ ಮಾಡಿದೆ.
