ಟೀಮ್ ಇಂಡಿಯಾ ಆಟಗಾರ ವಿರಾಟ್ ಕೊಹ್ಲಿ (Virat Kohli) ಹಾಗೂ ನಟಿ ಅನುಷ್ಕಾ ಶರ್ಮಾ (Anushka Sharma) ಮುಂಬೈನಲ್ಲಿ (Mumbai) ನಡೆದ ಆಧ್ಯಾತ್ಮಿಕ ಕೀರ್ತನೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಗಮನ ಸೆಳೆದಿದ್ದಾರೆ.
ಅಮೆರಿಕದ ಪ್ರಸಿದ್ಧ ಭಕ್ತಿ ಸಂಗೀತ ಗಾಯಕ ಕೃಷ್ಣ ದಾಸ್ ಅವರು ನಡೆಸಿಕೊಟ್ಟ ಈ ಕಾರ್ಯಕ್ರಮದಲ್ಲಿ ಕೊಹ್ಲಿ ದಂಪತಿ ಸಂಪೂರ್ಣವಾಗಿ ಭಕ್ತಿಪರವಶರಾಗಿದ್ದರು.
ಮುಂಬೈನ ಗೇಟ್‌ವೇ ಆಫ್ ಇಂಡಿಯಾಗೆ ಆಗಮಿಸಿದ ಈ ಜೋಡಿ, ಭಜನೆಯಲ್ಲಿ ಪಾಲ್ಗೊಂಡ ವಿಡಿಯೋಗಳು ಮತ್ತು ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ.
ಆಧ್ಯಾತ್ಮಿಕ ವಾತಾವರಣದಲ್ಲಿ ಶುಭ್ರ ಮನಸ್ಸಿನಿಂದ ಭಜನೆ
ಭಾನುವಾರ ನಡೆದ ಈ ಆಧ್ಯಾತ್ಮಿಕ ಸಂಜೆಯಲ್ಲಿ ಅನುಷ್ಕಾ ಶರ್ಮಾ ಚಪ್ಪಾಳೆ ತಟ್ಟುತ್ತಾ ಭಜನೆಗಳನ್ನು ಗುನುಗುನಿಸುತ್ತಿದ್ದರೆ, ವಿರಾಟ್ ಕೊಹ್ಲಿ ಕೂಡ ತಲ್ಲೀನರಾಗಿ ಹಾಡುತ್ತಾ ವಾತಾವರಣವನ್ನು ಆನಂದಿಸುತ್ತಿರುವುದು ವೈರಲ್ ವಿಡಿಯೋದಲ್ಲಿ ಕಂಡುಬಂದಿದೆ.
ಈ ದಂಪತಿ ಕೃಷ್ಣ ದಾಸ್ ಅವರ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುತ್ತಿರುವುದು ಇದೇ ಮೊದಲೇನಲ್ಲ. ಕಳೆದ ಜುಲೈನಲ್ಲಿ ಲಂಡನ್‌ನ ಯೂನಿಯನ್ ಚಾಪೆಲ್‌ನಲ್ಲಿ ನಡೆದಿದ್ದ ಭಜನಾ ಸಂಜೆಯಲ್ಲೂ ಇಬ್ಬರೂ ಹಾಜರಿದ್ದರು.
ದೇಶ-ವಿದೇಶಗಳಲ್ಲಿ ನಡೆಯುವ ಇಂತಹ ಹಲವು ಆಧ್ಯಾತ್ಮಿಕ ಕೂಟಗಳಲ್ಲಿ ಇವರು ನಿಯಮಿತವಾಗಿ ಕಾಣಿಸಿಕೊಳ್ಳುತ್ತಾರೆ.
