ನವದೆಹಲಿ: ಇಸ್ರೋದ ಚಂದ್ರಯಾನ-3 ಮಿಷನ್ಗೆ ಸಂಬಂಧಿಸಿದಂತೆ ವಿಜ್ಞಾನಿಗಳು ಮತ್ತೊಂದು ಮಹತ್ವದ ಸಂಶೋಧನೆಯನ್ನು ಹೊರಹಾಕಿದ್ದಾರೆ.
ಚಂದ್ರನ ದಕ್ಷಿಣ ಧ್ರುವದ ಬಳಿ ವಿಕ್ರಮ್ ಲ್ಯಾಂಡರ್ ಇಳಿದಿರುವ "ಶಿವ ಶಕ್ತಿ ಪಾಯಿಂಟ್' ಪ್ರದೇಶದಲ್ಲಿ, ಮೇಲ್ಮೈಯ ಕೇವಲ 10 ಸೆಂಟಿಮೀಟರ್ ಆಳದವರೆಗೆ ಒಟ್ಟು 3 ವಿಭಿನ್ನ ಭೌತಿಕ ಹಾಗೂ ಉಷ್ಣಾಂಶ ಗುಣಲಕ್ಷಣಗಳನ್ನು ಹೊಂದಿರುವ ಪದರಗಳು ಇರುವುದನ್ನು ಸಂಶೋಧಕರು ಪತ್ತೆಹಚ್ಚಿದ್ದಾರೆ.
ಅಹಮದಾಬಾದ್ನ ಭೌತಿಕ ಸಂಶೋಧನಾ ಪ್ರಯೋಗಾಲಯದ ವಿಜ್ಞಾನಿ ಕೆ.ದುರ್ಗಾ ಪ್ರಸಾದ್ ನೇತೃತ್ವದಲ್ಲಿ ನಡೆಸಲಾದ ಈ ಅಧ್ಯಯನದ ವರದಿಗಳು ಪ್ರತಿಷ್ಠಿತ "ಎನ್ಪಿಜೆ ಸ್ಪೇಸ್ ಎಕ್ಸ್ಪ್ಲೋರೇಷನ್' ಜರ್ನಲ್ನಲ್ಲಿ ಪ್ರಕಟವಾಗಿವೆ.
ಚಂದ್ರನ ಮೇಲ್ಮೈ ಮಣ್ಣು ಎಲ್ಲೆಡೆ ಒಂದೇ ರೀತಿಯ ಏಕರೂಪದ ಧೂಳಿನಿಂದ ಕೂಡಿದೆ ಎಂಬ ಹಿಂದಿನ ಊಹೆಗಳನ್ನು ಈ ಹೊಸ ವಿಶ್ಲೇಷಣೆ ಸುಳ್ಳು ಮಾಡಿದೆ.
ವಿಕ್ರಮ್ ಲ್ಯಾಂಡರ್ನಲ್ಲಿ ಅಳವಡಿಸಲಾಗಿದ್ದ "ಚಂದ್ರನ ಮೇಲ್ಮೈ ಉಷ್ಣ ಭೌತಿಕ ಪ್ರಯೋಗ' ಉಪಕರಣ ಕಳುಹಿಸಿದ ದತ್ತಾಂಶಗಳ ಆಧಾರದ ಮೇಲೆ ಚಂದ್ರನ ಮಣ್ಣಿನ ರಚನೆಯಲ್ಲಿ ಈ ವೈವಿಧ್ಯತೆ ಬೆಳಕಿಗೆ ಬಂದಿದೆ.


