ಬೆಂಗಳೂರು:9 ತಿಂಗಳ (39 ವಾರಗಳ) ಪೂರ್ಣ ಗರ್ಭಿಣಿಯಾಗಿರುವ ಬೆಂಗಳೂರಿನ ಮಹಿಳೆಯೊಬ್ಬರು ಅತ್ಯಂತ ಕಠಿಣವಾದ ಯೋಗಾಸನಗಳನ್ನು ಮಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಮಹಿಳೆ ಪ್ರದರ್ಶಿಸಿದ ದೈಹಿಕ ಶಕ್ತಿ ಮತ್ತು ಶಿಸ್ತನ್ನು ನೆಟ್ಟಿಗರು ಶ್ಲಾಘಿಸಿದ್ದಾರೆ.
ವೃತ್ತಿಯಲ್ಲಿ ಯೋಗ ಶಿಕ್ಷಕಿಯಾಗಿರುವ ಶಶಿ ಪ್ರಭಾ ದ್ವಿವೇದಿ ಎಂಬುವವರೇ ಈ ವಿಡಿಯೋ ಹಂಚಿಕೊಂಡ ಮಹಿಳೆ. ಅವರು ಸೀರೆ ಉಟ್ಟುಕೊಂಡು ಗರ್ಭಾವಸ್ಥೆಯ ಅಂತಿಮ ಹಂತದಲ್ಲಿ 'ಚಕ್ರಾಸ್ನ' ಸೇರಿದಂತೆ ಹಲವು ಕಠಿಣ ಯೋಗಾಸನಗಳನ್ನು ಸುಲಭವಾಗಿ ಮಾಡುತ್ತಿರುವುದು ವಿಡಿಯೋದಲ್ಲಿದೆ. ಈ ವಿಡಿಯೋ ಈಗಾಗಲೇ 2.1 ಕೋಟಿಗೂ (21 Million) ಹೆಚ್ಚು ವೀಕ್ಷಣೆಗಳನ್ನು ಪಡೆದುಕೊಂಡಿದೆ.
ವಿಡಿಯೋದ ಶೀರ್ಷಿಕೆಯಲ್ಲಿ ಶಶಿ ಪ್ರಭಾ ಅವರು, ತಾವು ಮಾಡುತ್ತಿರುವ ಯೋಗಾಸನಗಳು ವರ್ಷಗಳ ತರಬೇತಿಯ ಫಲವೇ ಹೊರತು, ಇದನ್ನು ಇತರರು ಅನುಕರಿಸಲು ನೀಡುತ್ತಿರುವ ಸಲಹೆಯಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
39 ವಾರಗಳು, 9 ತಿಂಗಳು. ಇದು ನನ್ನ ವಾಸ್ತವ. ಜನ ಕೇವಲ ಆಸನಗಳನ್ನು ನೋಡುತ್ತಾರೆ. ಆದರೆ ಇದರ ಹಿಂದೆ ನನ್ನ ದೇಹವನ್ನು ನಾನು ಸಜ್ಜುಗೊಳಿಸಲು, ಶಕ್ತಿ ಮತ್ತು ತಾಳ್ಮೆ ಬೆಳೆಸಿಕೊಳ್ಳಲು ವರ್ಷಗಟ್ಟಲೆ ನಡೆಸಿದ ಪರಿಶ್ರಮ ಅವರಿಗೆ ಕಾಣುವುದಿಲ್ಲ," ಎಂದು ಬರೆದುಕೊಂಡಿದ್ದಾರೆ.
