ಬೆಂಗಳೂರು: ತನ್ನ ಜೊತೆಗಿದ್ದ ವಿವಾಹಿತ ಪ್ರಿಯತಮೆ ಜಗಳವಾಡಿ ದೂರ ಹೋದಳು ಎಂಬ ಕಾರಣಕ್ಕೆ ತೀವ್ರ ಮನನೊಂದ ಯುವಕನೊಬ್ಬ, ಮೈಮೇಲೆ ಪೆಟ್ರೋಲ್ (Petrol) ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ (Suicide) ಮಾಡಿಕೊಂಡಿರುವ ಘಟನೆ ಬೆಂಗಳೂರು (Bengaluru) ಉತ್ತರ ತಾಲೂಕಿನ ಹನುಮಂತ ಸಾಗರದ ಬಳಿ ನಡೆದಿದೆ.
ವಿವಾಹಿತೆಯೊಂದಿಗಿನ ಪ್ರೇಮಪಾಶ
ಆಂಧ್ರಪ್ರದೇಶದ ಹಿಂದೂಪುರ ಮೂಲದ 28 ವರ್ಷದ ಪವನ್ ಕುಮಾರ್ ಸಾವನ್ನಪ್ಪಿದ ದುರ್ದೈವಿ.ಮೃತ ಪವನ್ ಕುಮಾರ್, ನಾಗಮಣಿ ಎಂಬ ವಿವಾಹಿತೆಯೊಂದಿಗೆ ಅಕ್ರಮ ಸಂಬಂಧ ಬೆಳೆಸಿದ್ದನು. ಈ ಪ್ರೇಮದಾಟ ಎಷ್ಟರಮಟ್ಟಿಗೆ ಇತ್ತೆಂದರೆ, ಎರಡು ವರ್ಷಗಳ ಹಿಂದೆಯೇ ನಾಗಮಣಿ ತನ್ನ ಪತಿ ಹಾಗೂ ಮಕ್ಕಳನ್ನು ತೊರೆದು ಪವನ್ ಜೊತೆ ಬಂದಿದ್ದಳು. ಅಂದಿನಿಂದ ಇವರಿಬ್ಬರೂ ರಾಜಾನುಕುಂಟೆ ಸೇರಿದಂತೆ ನಗರದ ವಿವಿಧೆಡೆ ಬಾಡಿಗೆ ಮನೆಗಳಲ್ಲಿ ಒಟ್ಟಿಗೆ ಜೀವನ ನಡೆಸುತ್ತಿದ್ದರು.
ಮುನಿಸಿಕೊಂಡು ಹೋದ ಪ್ರಿಯತಮೆ
ಎರಡು ವರ್ಷಗಳ ಕಾಲ ಅನ್ಯೋನ್ಯವಾಗಿದ್ದ ಇಬ್ಬರ ನಡುವೆ ಕಳೆದ ಒಂದು ವಾರದ ಹಿಂದೆ ಯಾವುದೋ ವಿಚಾರಕ್ಕೆ ದೊಡ್ಡಮಟ್ಟದ ಗಲಾಟೆ ನಡೆದಿದೆ. ಈ ಜಗಳದಿಂದ ಬೇಸತ್ತ ನಾಗಮಣಿ, ಪವನ್ನನ್ನು ಬಿಟ್ಟು ಹನುಮಂತ ಸಾಗರದ ಬಳಿ ಇರುವ ತನ್ನ ಸಂಬಂಧಿಕರ ಮನೆಗೆ ತೆರಳಿದ್ದಳು. ತನ್ನ ಸರ್ವಸ್ವ ಎಂದು ಭಾವಿಸಿದ್ದ ಪ್ರಿಯತಮೆ ಬಿಟ್ಟು ಹೋದದ್ದನ್ನು ಸಹಿಸಿಕೊಳ್ಳಲಾಗದ ಪವನ್, ತೀವ್ರ ಹತಾಶೆಗೆ ಒಳಗಾಗಿದ್ದನು.
ರಸ್ತೆ ಮಧ್ಯೆಯೇ ಪೆಟ್ರೋಲ್ ಸುರಿದುಕೊಂಡು ಕೃತ್ಯ
ನಾಗಮಣಿಯನ್ನು ಹೇಗಾದರೂ ಮಾಡಿ ವಾಪಸ್ ಕರೆತರಬೇಕೆಂದು ನಿರ್ಧರಿಸಿದ ಪವನ್, ಕೈಯಲ್ಲಿ ಪೆಟ್ರೋಲ್ ಬಾಟಲಿಯೊಂದಿಗೆ ಆಕೆ ಇದ್ದ ಹನುಮಂತ ಸಾಗರದ ಬಳಿ ಧಾವಿಸಿದ್ದಾನೆ. ಅಲ್ಲಿಂದಲೇ ಆಕೆಗೆ ಕರೆ ಮಾಡಿ, ತನ್ನ ಜೊತೆ ಮರಳಿ ಬರುವಂತೆ ಪಟ್ಟು ಹಿಡಿದು ಗಲಾಟೆ ಮಾಡಿದ್ದಾನೆ.
ಆದರೆ ಆ ಕಡೆಯಿಂದ ನಾಗಮಣಿ ಯಾವುದೇ ಸ್ಪಂದನೆ ನೀಡದಿದ್ದಾಗ ಆಕ್ರೋಶದ ಕಟ್ಟೆಯೊಡೆದಿದೆ. ಕ್ಷಣಾರ್ಧದಲ್ಲಿ ತನ್ನ ಮೈಮೇಲೆ ಪೆಟ್ರೋಲ್ ಸುರಿದುಕೊಂಡ ಪವನ್, ಬೆಂಕಿ ಹಚ್ಚಿಕೊಂಡು ಒದ್ದಾಡಿದ್ದಾನೆ.
ಚಿಕಿತ್ಸೆ ಫಲಿಸದೆ ವಿಕ್ಟೋರಿಯಾದಲ್ಲಿ ಸಾವು
ಯುವಕನೊಬ್ಬ ಬೆಂಕಿಯ ಕೆನ್ನಾಲಿಗೆಗೆ ಸಿಲುಕಿ ನರಳಾಡುತ್ತಿರುವುದನ್ನು ಕಂಡ ಸ್ಥಳೀಯರು, ತಕ್ಷಣವೇ ಧಾವಿಸಿ ಬೆಂಕಿ ನಂದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಳಿಕ ಗಂಭೀರ ಸ್ಥಿತಿಯಲ್ಲಿದ್ದ ಆತನನ್ನು ತುರ್ತು ಚಿಕಿತ್ಸೆಗಾಗಿ ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಿಸಿದ್ದರು.
ಆದರೆ, ಬೆಂಕಿಯ ತೀವ್ರತೆಗೆ ದೇಹದ ಬಹುಪಾಲು ಸುಟ್ಟುಹೋಗಿದ್ದರಿಂದ ಚಿಕಿತ್ಸೆ ಫಲಕಾರಿಯಾಗದೆ ಪವನ್ ಕುಮಾರ್ ಕೊನೆಯುಸಿರೆಳೆದಿದ್ದಾನೆ. ಈ ಘಟನೆಗೆ ಸಂಬಂಧಿಸಿದಂತೆ ಮಾದನಾಯಕನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ.


