ಬೆಳಗಾವಿ: ಲೈಂಗಿಕ ಕಿರುಕುಳದಿಂದ ಬೇಸತ್ತ ಮಹಿಳೆಯೊಬ್ಬಳು ತನ್ನ ಶಾಲಾ ಸ್ನೇಹಿತನೊಂದಿಗೆ ಸೇರಿ ಕಾಟ ನೀಡುತ್ತಿದ್ದ ವ್ಯಕ್ತಿಯನ್ನು ಭೀಕರವಾಗಿ ಹತ್ಯೆ ಮಾಡಿರುವ (Crime) ಘಟನೆ ಬೆಳಗಾವಿ ಜಿಲ್ಲೆಯ ಅಥಣಿ ತಾಲೂಕಿನ ಬಳ್ಳಿಗೇರಿ ಗ್ರಾಮದಲ್ಲಿ ನಡೆದಿದೆ.
ಕಿರುಕುಳವೇ ಕೊಲೆಗೆ ಅಂತಿಮ ಕಾರಣ
ಬಳ್ಳಿಗೇರಿ ನಿವಾಸಿ ರಣವೀರ ರಜಪೂತ ಎಂಬಾತ, ಸ್ಥಳೀಯ ಮಹಿಳೆ ಶ್ರೀದೇವಿ ರಜಪೂತ ಎಂಬಾಕೆಗೆ ಸತತವಾಗಿ ಲೈಂಗಿಕ ಕಿರುಕುಳ ನೀಡುತ್ತಾ ಮಾನಸಿಕ ಹಿಂಸೆ ನೀಡುತ್ತಿದ್ದನು ಎನ್ನಲಾಗಿದೆ.
ಈ ಕಿರುಕುಳದಿಂದ ಬೇಸತ್ತ ಮಹಿಳೆ, ಹೇಗಾದರೂ ಮಾಡಿ ಈ ಕಾಟದಿಂದ ಮುಕ್ತಿ ಪಡೆಯಲು ನಿರ್ಧರಿಸಿದ್ದಾಳೆ.
ಕೊನೆಗೆ ತನ್ನ ಶಾಲೆಯ ದಿನಗಳ ಗೆಳೆಯನಾದ ಬೈರು ಪವಾರ್ ಬಳಿ ತನ್ನ ಅಳಲು ತೋಡಿಕೊಂಡಿದ್ದು, ಇಬ್ಬರೂ ಸೇರಿ ರಣವೀರನನ್ನು ಕೊಲೆ ಮಾಡಲು ಸಂಚು ರೂಪಿಸಿದ್ದಾರೆ.
ಬೈಕ್ ರಿಪೇರಿ ನೆಪದಲ್ಲಿ ಕರೆಸಿ ಸಂಚು
ಪ್ಲಾನ್ ಪ್ರಕಾರ, ಸೆಪ್ಟೆಂಬರ್ 21ರ ರಾತ್ರಿ ಬೈರು ಪವಾರ್, ರಣವೀರನಿಗೆ ಕರೆ ಮಾಡಿ ತನ್ನ ಬೈಕ್ ಕೆಟ್ಟು ನಿಂತಿದೆ ಎಂದು ನಂಬಿಸಿ ಏಕಾಂತ ಸ್ಥಳಕ್ಕೆ ಕರೆಸಿಕೊಂಡಿದ್ದಾನೆ. ಇದನ್ನು ನಂಬಿ ಸ್ಥಳಕ್ಕೆ ತೆರಳಿದ ರಣವೀರನ ಕುತ್ತಿಗೆ ಹಿಸುಕಿ ಪ್ರಾಣ ತೆಗೆದಿದ್ದಾರೆ.
ಕೃತ್ಯ ಮುಗಿದ ಕೂಡಲೇ ಬೈರು ನೇರವಾಗಿ ಶ್ರೀದೇವಿಗೆ ಫೋನ್ ಮಾಡಿ ಕೆಲಸ ಮುಗಿದಿದ್ದರ ಬಗ್ಗೆ ಮಾಹಿತಿ ನೀಡಿದ್ದನು ಎಂದು ಪೊಲೀಸ್ ತನಿಖೆಯಿಂದ ತಿಳಿದುಬಂದಿದೆ.
ಈ ರೋಚಕ ಕೊಲೆ ಪ್ರಕರಣದ ಜಾಡು ಹಿಡಿದು ಹೊರಟ ಅಥಣಿ ಠಾಣೆಯ ಪೊಲೀಸರು, ವೈಜ್ಞಾನಿಕ ತನಿಖೆ ಹಾಗೂ ಮಾಹಿತಿ ಕಲೆಹಾಕಿ ಕೊಲೆಗಡುಕರಾದ ಶ್ರೀದೇವಿ ರಜಪೂತ ಮತ್ತು ಬೈರು ಪವಾರ್ ಅವರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಸದ್ಯ ಇಬ್ಬರೂ ಆರೋಪಿಗಳನ್ನು ವಶಕ್ಕೆ ಪಡೆದಿರುವ ಪೊಲೀಸರು, ತನಿಖೆಯನ್ನು ತೀವ್ರಗೊಳಿಸಿದ್ದು ಮುಂದಿನ ಕಾನೂನು ಕ್ರಮ ಜರುಗಿಸುತ್ತಿದ್ದಾರೆ.ಈ
