ಬೆಂಗಳೂರು: ನಿನ್ನೆಯಿಂದ ಪ್ರಾರಂಭವಾಗಿರುವ ವಿಧಾನ ಪರಿಷತ್ ಅಧಿವೇಶನದಲ್ಲಿ ಇಂದು ಕೂಡಾ ಉಭಯ ಪಕ್ಷಗಳ ನಾಯಕರ ನಡುವೆ ಗದ್ದಲ ಏರ್ಪಟ್ಟಿದೆ.
ಮುಖ್ಯವಾಗಿ ಕಸ್ತೂರಿ ರಂಗನ್ ವರದಿ ಕುರಿತಂತೆ ಪರ ವಿರೋಧ ಚರ್ಚೆಗಳು ತೀವ್ರವಾಗಿದ್ದು, ಇದೇ ಸಂದರ್ಭ ವಿಧಾನ ಪರಿಷತ್ ಸದಸ್ಯ ಬಿ.ಕೆ.ಹರಿಪ್ರಸಾದ್ ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.
ವಿಧಾನ ಪರಿಷತ್ ಅಧಿವೇಶದ ಸಂದರ್ಭ ಏರ್ಪಟ್ಟ ಗದ್ದಲದ ನಡುವೆ ಎದ್ದು ನಿಂತು ಆಕ್ರೋಶ ಹೊರ ಹಾಕಿದ ಬಿ.ಕೆ ಹರಿಪ್ರಸಾದ್, ನಾನು ಈಗಲೂ ಹೇಳುವೆ, ಪ್ರಧಾನಿ ನರೇಂದ್ರ ಮೋದಿ ಅವರು 800 ರೈತರ ಕೊಲೆ ಮಾಡಿದ್ದಾರೆ. ಅವರಿಂದಾಗಿ ದೇಶಾದ್ಯಂತ 800 ಅನ್ನದಾತರ ಕೊಲೆ ಆಗಿದೆ ಎಂದು ನಾಲಿಗೆ ಹರಿಬಿಟ್ಟಿದ್ದಾರೆ.
ಇದೇ ವೇಳೆ ಸದನದ ಗದ್ದಲವನ್ನು ತಣ್ಣಗಾಗಿಸಲು ಸ್ಪೀಕರ್ ಸಲೀಂ ಅಹಮದ್ ಎದ್ದುನಿಂತು ಎಲ್ಲರನ್ನು ಶಾಂತರಾಗುವಂತೆ ಮನವಿ ಮಾಡಿಕೊಂಡಿದ್ದಾರೆ. ಸಭಿಕರ ಗದ್ದಲ ಹೆಚ್ಚಾದಂತೆ ಗುಡುಗಿದ ಸ್ಪೀಕರ್, ಸದನದಲ್ಲಿ ಹೇಗಿರಬೇಕು ಎಂಬುದರ ಬಗ್ಗೆ ಸ್ವಲ್ಪ ಸೆನ್ಸ್ ಇರಬೇಕು.
ನಾನು ನಿಂತುಕೊಂಡು ಮಾತನಾಡುತ್ತಿದ್ದೇನೆ ಎಂದರೆ ನೀವೆಲ್ಲರೂ ಶಾಂತರಾಗಿ ಕುಳಿತುಕೊಳ್ಳಬೇಕು. ಒಬ್ಬೊಬ್ಬರಾಗಿ ಮಾತನಾಡಲು ಎಲ್ಲರಿಗೂ ಅವಕಾಶ ನೀಡುತ್ತೇವೆ. ಇದೇನು ಫಿಶ್ ಮಾರ್ಕೆಟ್ ಅಲ್ಲ ಎಂದು ಗದರಿದ್ದಾರೆ.
