ನವದೆಹಲಿ: ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಉಂಟಾಗಿದ್ದ ಪೂರೈಕೆಯ ಆತಂಕಗಳು ದೂರವಾಗಿರುವ ಹಿನ್ನೆಲೆಯಲ್ಲಿ, ಪೆಟ್ರೋಲ್ ಮತ್ತು ಡೀಸೆಲ್ ಮಾರಾಟದ ಮೇಲೆ ಹೇರಲಾಗಿದ್ದ ಎಲ್ಲಾ ತಾತ್ಕಾಲಿಕ ನಿರ್ಬಂಧಗಳನ್ನು ಮುಂಬರುವ ಜುಲೈ 1 ರಿಂದ ಸಂಪೂರ್ಣವಾಗಿ ಹಿಂಪಡೆಯಲು ಸರ್ಕಾರ ನಿರ್ಧರಿಸಿದೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಮಧ್ಯಪ್ರಾಚ್ಯದಲ್ಲಿ (ಇರಾನ್-ಇಸ್ರೇಲ್) ನಡೆಯುತ್ತಿರುವ ಸಂಘರ್ಷದಿಂದಾಗಿ ಜಾಗತಿಕ ಸರಬರಾಜು ಸರಪಳಿಗೆ ಧಕ್ಕೆಯಾಗಿತ್ತು. ಇದರಿಂದ ದೇಶದಲ್ಲಿ ತೈಲ ಅಭಾವ ಸೃಷ್ಟಿಯಾಗಬಹುದು ಎಂಬ ಮುನ್ನೆಚ್ಚರಿಕೆಯಿಂದ ಸರ್ಕಾರ ಇಂಧನ ವಿತರಣೆಯ ಮೇಲೆ ಕೆಲವು ಕಠಿಣ ಮಿತಿಗಳನ್ನು ಜಾರಿಗೆ ತಂದಿತ್ತು.
ವಾಣಿಜ್ಯ ಬಳಕೆದಾರರಿಗೆ ಸಿಗಲಿದೆ ದೊಡ್ಡ ರಿಲೀಫ್
ಈ ಹಿಂದೆ ಜಾರಿಯಲ್ಲಿದ್ದ ನಿಯಮಗಳ ಪ್ರಕಾರ, ವಾಣಿಜ್ಯ ಸಂಸ್ಥೆಗಳು ಅಥವಾ ಬೃಹತ್ ಖರೀದಿದಾರರು (Commercial Buyers) ಚಿಲ್ಲರೆ ಪೆಟ್ರೋಲ್ ಬಂಕ್ಗಳಲ್ಲಿ ಇಂಧನ ಖರೀದಿಸುವುದನ್ನು ನಿರ್ಬಂಧಿಸಲಾಗಿತ್ತು.
ಅಲ್ಲದೆ, ಜಾಗತಿಕ ಪರಿಸ್ಥಿತಿ ಮತ್ತಷ್ಟು ಹದಗೆಟ್ಟರೆ ಸಾರ್ವಜನಿಕರಿಗೆ ಇಂಧನದ ಕೊರತೆಯಾಗಬಾರದು ಎಂಬ ಉದ್ದೇಶದಿಂದ ಡೀಸೆಲ್ನ ದೈನಂದಿನ ಖರೀದಿಯ ಮೇಲೂ ಮಿತಿಯನ್ನು ಹೇರಲಾಗಿತ್ತು.
ಸೋಮವಾರ ಹೊರಡಿಸಲಾದ ಅಧಿಕೃತ ಆದೇಶದಲ್ಲಿ ಸರ್ಕಾರವು ಈ ಎಲ್ಲಾ ತಾತ್ಕಾಲಿಕ ಮಿತಿಗಳನ್ನು ಜುಲೈ 1 ರಿಂದ ಕೊನೆಗೊಳಿಸುವುದಾಗಿ ತಿಳಿಸಿದೆ.
ಇದರಿಂದಾಗಿ ಸಾರಿಗೆ ಆಪರೇಟರ್ಗಳು, ವ್ಯಾಪಾರಸ್ಥರು ಮತ್ತು ಇತರ ವಾಣಿಜ್ಯ ಬಳಕೆದಾರರು ಇನ್ಮುಂದೆ ಯಾವುದೇ ಅಡೆತಡೆಯಿಲ್ಲದೆ ಎಂದಿನಂತೆ ತೈಲವನ್ನು ಖರೀದಿಸಬಹುದಾಗಿದೆ.
ಜಾಗತಿಕ ಸ್ಥಿರತೆಯ ಬೆನ್ನಲ್ಲೇ ನಿರ್ಧಾರ
ಭಾರತವು ತನಗೆ ಬೇಕಾದ ಕಚ್ಚಾ ತೈಲದ ಬಹುಪಾಲು ಭಾಗವನ್ನು ವಿದೇಶಗಳಿಂದಲೇ ಆಮದು ಮಾಡಿಕೊಳ್ಳುವುದರಿಂದ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಗುವ ಸಣ್ಣ ಏರುಪೇರುಗಳೂ ದೇಶದ ಇಂಧನ ಲಭ್ಯತೆ ಮತ್ತು ಬೆಲೆಗಳ ಮೇಲೆ ತೀವ್ರ ಪರಿಣಾಮ ಬೀರುತ್ತವೆ. ಹೀಗಾಗಿಯೇ ಮುನ್ನೆಚ್ಚರಿಕಾ ಕ್ರಮವಾಗಿ ಈ ನಿಯಮಗಳನ್ನು ತರಲಾಗಿತ್ತು.
ಆದರೆ ಪ್ರಸ್ತುತ ಜಾಗತಿಕ ತೈಲ ಮಾರುಕಟ್ಟೆ ಮತ್ತು ಪೂರೈಕೆ ವ್ಯವಸ್ಥೆಯು ಸ್ಥಿರವಾಗಿರುವುದರಿಂದ, ಈ ತಾತ್ಕಾಲಿಕ ನಿರ್ಬಂಧಗಳ ಅಗತ್ಯ ಇನ್ನು ಮುಂದೆ ಇಲ್ಲ ಎಂದು ಸರ್ಕಾರ ತೀರ್ಮಾನಿಸಿದೆ. ಇದರೊಂದಿಗೆ ಜುಲೈ ಆರಂಭದಿಂದ ದೇಶಾದ್ಯಂತ ಇಂಧನ ಮಾರಾಟ ಪ್ರಕ್ರಿಯೆಯು ಹಳೆಯ ಸಹಜ ಸ್ಥಿತಿಗೆ ಮರಳಲಿದೆ.
