ಬೆಳಗಾವಿ: ಹಸುಗಳಿಗೆ ಮೇವು ಹಾಕುವ ಕ್ಷುಲ್ಲಕ ವಿಚಾರಕ್ಕೆ ಸಂಬಂಧಿಸಿದಂತೆ ಪತಿ ಮತ್ತು ಪತ್ನಿಯ ನಡುವೆ ಆರಂಭವಾದ ಸಣ್ಣ ಪ್ರಮಾಣದ ಜಗಳವೊಂದು ಕೊಲೆಯಲ್ಲಿ ಅಂತ್ಯವಾಗಿರುವ ಭೀಕರ ಘಟನೆ ಬೆಳಗಾವಿ ಜಿಲ್ಲೆಯ ರಾಯಭಾಗ ತಾಲೂಕಿನ ಮಾಡಲಗಿ ಗ್ರಾಮದಲ್ಲಿ ನಡೆದಿದೆ.
ಸಣ್ಣಪುಟ್ಟ ಕೌಟುಂಬಿಕ ಕಲಹವು ಅತಿಯಾದ ಕೋಪಕ್ಕೆ ತಿರುಗಿ, ಪತಿಯೇ ತನ್ನ ಪತ್ನಿಯನ್ನು ಕುಡಗೋಲಿನಿಂದ (Crime) ಭೀಕರವಾಗಿ (Belagavi) ಕೊಚ್ಚಿ ಕೊಲೆ ಮಾಡಿದ್ದಾನೆ.
ಮಾಡಲಗಿ ಗ್ರಾಮದ ನಿವಾಸಿ ಕಲ್ಲವ್ವ ಮರಡಿ (55) ಎಂಬುವವರೇ ಪತಿಯಿಂದಲೇ ಕೊಲೆಯಾದ ದುರ್ದೈವಿ ಮಹಿಳೆಯಾಗಿದ್ದಾರೆ. ಈ ಭೀಕರ ಕೃತ್ಯವೆಸಗಿದ ಆರೋಪಿ ಪತಿಯನ್ನು ಸದಾಶಿವ ಮರಡಿ (67) ಎಂದು ಗುರುತಿಸಲಾಗಿದೆ.
ಸ್ಥಳೀಯರ ಹಾಗೂ ಪೊಲೀಸರ ಮಾಹಿತಿಯ ಪ್ರಕಾರ, ಕಲ್ಲವ್ವ ಮತ್ತು ಸದಾಶಿವ ದಂಪತಿಯ ನಡುವೆ ಕಳೆದ ಹಲವು ವರ್ಷಗಳಿಂದ ಕ್ಷುಲ್ಲಕ ಕಾರಣಗಳಿಗೆ ನಿರಂತರವಾಗಿ ಜಗಳ ಹಾಗೂ ಕೌಟುಂಬಿಕ ಮನಸ್ತಾಪಗಳು ನಡೆಯುತ್ತಿದ್ದವು.
ಘಟನೆಯ ದಿನದಂದು ಮನೆಯಲ್ಲಿದ್ದ ಜಾನುವಾರುಗಳಿಗೆ ಮೇವು ಹಾಕುವ ವಿಚಾರಕ್ಕೆ ಸಂಬಂಧಿಸಿದಂತೆ ದಂಪತಿಗಳ ನಡುವೆ ಮಾತಿಗೆ ಮಾತು ಬೆಳೆದು ತೀವ್ರ ಜಗಳ ಆರಂಭವಾಗಿತ್ತು.
ಗಲಾಟೆಯ ನಂತರ ಕೋಪಿಸಿಕೊಂಡ ಕಲ್ಲವ್ವ ಅವರು ಜಾನುವಾರುಗಳಿಗೆ ಹಸಿರು ಮೇವು ಕೊಯ್ದುಕೊಂಡು ಬರಲು ಸಮೀಪದ ಕಬ್ಬಿನ ಗದ್ದೆಗೆ ತೆರಳಿದ್ದರು. ಆದರೆ ಜಗಳದ ಕಾವು ಆರದಿದ್ದ ಪತಿ ಸದಾಶಿವ, ಪತ್ನಿಯ ಮೇಲಿದ್ದ ಕೋಪದಿಂದ ಕುಡಗೋಲನ್ನು ಹಿಡಿದುಕೊಂಡು ಆಕೆಯ ಹಿಂದೆಯೇ ಕಬ್ಬಿನ ಗದ್ದೆಗೆ ತೆರಳಿದ್ದಾನೆ.
ಗದ್ದೆಯಲ್ಲಿ ಮೇವು ಕೊಯ್ಯುತ್ತಿದ್ದ ಕಲ್ಲವ್ವ ಅವರ ಮೇಲೆ ಸದಾಶಿವ ಏಕಾಏಕಿ ಕುಡಗೋಲಿನಿಂದ ತೀವ್ರವಾಗಿ ಹಲ್ಲೆ ನಡೆಸಿದ್ದಾನೆ. ಕತ್ತಿನ ಭಾಗಕ್ಕೆ ಬಲವಾದ ಪೆಟ್ಟು ಬಿದ್ದ ಪರಿಣಾಮ ರಕ್ತಸ್ರಾವವಾಗಿ ಕಲ್ಲವ್ವ ಅವರು ಘಟನಾ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.
