ನವದೆಹಲಿ: ದೇಶಿಯ ಮಾರುಕಟ್ಟೆಯಲ್ಲಿ ಸಕ್ಕರೆ ಲಭ್ಯತೆಯನ್ನು ಕಾಯ್ದುಕೊಳ್ಳಲು ಮತ್ತು ಬೆಲೆ ಏರಿಕೆಯನ್ನು ನಿಯಂತ್ರಿಸಲು ಕೇಂದ್ರ ಸರ್ಕಾರವು ಸಕ್ಕರೆ ರಫ್ತಿನ ಮೇಲೆ ತಕ್ಷಣದಿಂದ ಜಾರಿಗೆ ಬರುವಂತೆ ಸೆಪ್ಟೆಂಬರ್ 30, 2026ರವರೆಗೆ ಸಂಪೂರ್ಣ ನಿಷೇಧ ಹೇರಿದೆ.
ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಅಡಿಯಲ್ಲಿ ಬರುವ ವಿದೇಶಿ ವ್ಯಾಪಾರ ಮಹಾನಿರ್ದೇಶನಾಲಯ (DGFT) ಬುಧವಾರ ಈ ಆದೇಶ ಹೊರಡಿಸಿದೆ.
ಈ ಹಿಂದೆ ಸಕ್ಕರೆ ರಫ್ತನ್ನು 'ನಿರ್ಬಂಧಿತ' (Restricted) ವಿಭಾಗದಲ್ಲಿ ಇರಿಸಲಾಗಿತ್ತು, ಆದರೆ ಈಗ ಅದನ್ನು 'ನಿಷೇಧಿತ' (Prohibited) ವರ್ಗಕ್ಕೆ ಸೇರಿಸುವ ಮೂಲಕ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ.
ಯಾವ ಸಕ್ಕರೆಗೆ ಅನ್ವಯ?: ಕಚ್ಚಾ ಸಕ್ಕರೆ (Raw sugar), ಬಿಳಿ ಸಕ್ಕರೆ ಮತ್ತು ಸಂಸ್ಕರಿಸಿದ ಸಕ್ಕರೆ (Refined sugar) ರಫ್ತನ್ನು ನಿಷೇಧಿಸಲಾಗಿದೆ.
ಮೇ 13ಕ್ಕಿಂತ ಮೊದಲು ಲೋಡಿಂಗ್ ಪ್ರಕ್ರಿಯೆ ಆರಂಭವಾಗಿರುವ ಅಥವಾ ಕಸ್ಟಮ್ಸ್ಗೆ ಹಸ್ತಾಂತರವಾಗಿರುವ ರವಾನೆಗಳಿಗೆ ಅವಕಾಶ ನೀಡಲಾಗುವುದು.
ಅಲ್ಲದೆ, ಅಮೆರಿಕ ಮತ್ತು ಯುರೋಪಿಯನ್ ಒಕ್ಕೂಟಕ್ಕೆ ನೀಡಲಾಗುವ ಕೋಟಾ ಆಧಾರಿತ ರಫ್ತಿಗೆ ಈ ನಿಷೇಧ ಅನ್ವಯಿಸುವುದಿಲ್ಲ.
ಇತರ ದೇಶಗಳ ಆಹಾರ ಭದ್ರತೆಯ ಅಗತ್ಯತೆಗಳನ್ನು ಪೂರೈಸಲು ಆಯಾ ಸರ್ಕಾರಗಳ ವಿನಂತಿಯ ಮೇರೆಗೆ ಭಾರತ ಸರ್ಕಾರವು ವಿಶೇಷ ಅನುಮತಿ ನೀಡುವ ಸಾಧ್ಯತೆಯಿದೆ.
ಏಕೀ ನಿರ್ಧಾರ? ಪ್ರಮುಖ ಕಾರಣಗಳು ಇಲ್ಲಿವೆ:
ದಾಸ್ತಾನು ಕೊರತೆಯ ಭೀತಿ: ಈ ವರ್ಷ ದೇಶದಲ್ಲಿ ಅಂದಾಜು 275 ಲಕ್ಷ ಟನ್ ಸಕ್ಕರೆ ಉತ್ಪಾದನೆಯ ನಿರೀಕ್ಷೆಯಿದೆ. ಹಳೆಯ ದಾಸ್ತಾನು ಸೇರಿ ಒಟ್ಟು 325 ಲಕ್ಷ ಟನ್ ಲಭ್ಯತೆಯಿದ್ದರೂ, ದೇಶಿಯ ಬೇಡಿಕೆ 280 ಲಕ್ಷ ಟನ್ಗಳಷ್ಟಿದೆ. ಇದರಿಂದಾಗಿ ವರ್ಷಾಂತ್ಯಕ್ಕೆ ಉಳಿಯುವ ದಾಸ್ತಾನು ಕಳೆದ 10 ವರ್ಷಗಳಲ್ಲೇ ಅತ್ಯಂತ ಕನಿಷ್ಠ ಮಟ್ಟಕ್ಕೆ (45 ಲಕ್ಷ ಟನ್) ಕುಸಿಯುವ ಭೀತಿಯಿದೆ.
ಹವಾಮಾನ ವೈಪರೀತ್ಯ: ಎಲ್ ನಿನೋ ಪ್ರಭಾವದಿಂದಾಗಿ ಮುಂಬರುವ ವರ್ಷಗಳಲ್ಲಿ ಮಳೆ ಕಡಿಮೆಯಾಗುವ ಸಾಧ್ಯತೆಯಿದ್ದು, ಕಬ್ಬಿನ ಇಳುವರಿ ಕುಂಠಿತವಾಗಬಹುದು ಎಂಬ ಆತಂಕ ಸರ್ಕಾರಕ್ಕಿದೆ.
ಮಧ್ಯಪ್ರಾಚ್ಯ ಬಿಕ್ಕಟ್ಟು: ಯುದ್ಧದ ಸನ್ನಿವೇಶದಿಂದಾಗಿ ರಸಗೊಬ್ಬರ ಪೂರೈಕೆಯಲ್ಲಿ ವ್ಯತ್ಯಯವಾಗುವ ಸಾಧ್ಯತೆಯಿದೆ, ಇದು ಮುಂದಿನ ಹಂಗಾಮಿನ ಉತ್ಪಾದನೆಯ ಮೇಲೆ ಪರಿಣಾಮ ಬೀರಬಹುದು.
ಹಣದುಬ್ಬರ ನಿಯಂತ್ರಣ: ಹಬ್ಬದ ಸೀಸನ್ಗಳಲ್ಲಿ ಸಕ್ಕರೆ ಬೆಲೆ ಏರಿಕೆಯಾಗದಂತೆ ತಡೆಯುವುದು ಸರ್ಕಾರದ ಮುಖ್ಯ ಉದ್ದೇಶವಾಗಿದೆ.
ಜಾಗತಿಕ ಮಾರುಕಟ್ಟೆಯ ಮೇಲೆ ಪರಿಣಾಮ
ಭಾರತವು ಬ್ರೆಜಿಲ್ ನಂತರ ವಿಶ್ವದ ಎರಡನೇ ಅತಿದೊಡ್ಡ ಸಕ್ಕರೆ ಉತ್ಪಾದಕ ದೇಶವಾಗಿದೆ. ಭಾರತದ ಈ ನಿರ್ಧಾರ ಹೊರಬೀಳುತ್ತಿದ್ದಂತೆಯೇ ಜಾಗತಿಕ ಮಾರುಕಟ್ಟೆಯಲ್ಲಿ ಸಕ್ಕರೆ ಬೆಲೆ ಏರಿಕೆಯಾಗಿದೆ.
ನ್ಯೂಯಾರ್ಕ್ನಲ್ಲಿ ಕಚ್ಚಾ ಸಕ್ಕರೆ ಬೆಲೆ ಶೇ. 2ರಷ್ಟು ಮತ್ತು ಲಂಡನ್ನಲ್ಲಿ ಬಿಳಿ ಸಕ್ಕರೆ ಬೆಲೆ ಶೇ. 3ರಷ್ಟು ಹೆಚ್ಚಳ ಕಂಡಿದೆ. ಏಷ್ಯಾ ಮತ್ತು ಆಫ್ರಿಕಾದ ದೇಶಗಳಿಗೆ ಸಕ್ಕರೆ ಪೂರೈಕೆಯಲ್ಲಿ ಈಗ ವ್ಯತ್ಯಯ ಉಂಟಾಗುವ ಸಾಧ್ಯತೆಯಿದೆ.
