ಸಾಮಾನ್ಯವಾಗಿ ಇಂಜಿನಿಯರಿಂಗ್ ಅಥವಾ ಐಟಿ (IT) ಓದಿದ ಯುವಕರು ಯಾವುದಾದರೂ ಬಹುರಾಷ್ಟ್ರೀಯ ಕಂಪನಿಯಲ್ಲಿ, ಎಸಿ ಆಫೀಸಿನಲ್ಲಿ ಕುಳಿತು ಸಾಫ್ಟ್ವೇರ್ ಉದ್ಯೋಗ ಮಾಡಬೇಕೆಂದು ಕನಸು ಕಾಣುತ್ತಾರೆ. ಆದರೆ, ಪ್ರಪಂಚದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶಗಳಲ್ಲಿ ಒಂದಾದ ಚೀನಾದಲ್ಲಿ ಪರಿಸ್ಥಿತಿ ತೀರಾ ಭಿನ್ನವಾಗಿದೆ.
ಅಲ್ಲಿನ ವಿದ್ಯಾವಂತರು, ಐಟಿ ಪದವೀಧರರು ಕುರಿ ಕಾಯುವ (Shepherd) ಉದ್ಯೋಗದತ್ತ ಮುಖ ಮಾಡುತ್ತಿದ್ದಾರೆ. ಕೇಳಲು ನಂಬಲು ಅಸಾಧ್ಯವೆನಿಸಿದರೂ, ಇದು ನೂರಕ್ಕೆ ನೂರು ಸತ್ಯ. ಚೀನಾದ ಯುವಜನತೆಯಲ್ಲಿ ಕಂಡುಬರುತ್ತಿರುವ ಈ ವಿಚಿತ್ರ ಬದಲಾವಣೆಯ ಹಿಂದಿರುವ ಅಸಲಿ ಕಾರಣಗಳೇನು ಎಂದು ನೋಡೋಣ.
ಹೆಚ್ಚುತ್ತಿರುವ ನಿರುದ್ಯೋಗ ಮತ್ತು ಕಾರ್ಪೊರೇಟ್ ಒತ್ತಡ: ಹೆಚ್ಚುತ್ತಿರುವ ನಿರುದ್ಯೋಗ ಮತ್ತು ಕಾರ್ಪೊರೇಟ್ ಒತ್ತಡದಿಂದ ಯುವಜನತೆ ಎಷ್ಟು ಬೇಸತ್ತಿದ್ದಾರೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ. ಚೀನಾದ ಇನ್ನರ್ ಮಂಗೋಲಿಯಾದ ರೈತರೊಬ್ಬರು ತಮ್ಮ ಜಮೀನಿನಲ್ಲಿ ಕುರಿಗಳನ್ನು ಮೇಯಿಸಲು ಇಬ್ಬರು ಕೆಲಸಗಾರರು ಬೇಕು ಎಂದು ನೀಡಿದ ಒಂದು ಸಣ್ಣ ಜಾಹೀರಾತು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ಉದ್ಯೋಗಕ್ಕಾಗಿ ಐಟಿ ಉದ್ಯೋಗಿಗಳು ಮತ್ತು ಪದವೀಧರರು ಮುಗಿಬಿದ್ದಿರುವುದು ಅಚ್ಚರಿ ಮೂಡಿಸಿದೆ.
ಚೀನಾದ ಐಟಿ ವಲಯದಲ್ಲಿ ‘996’ (ಬೆಳಗ್ಗೆ 9 ರಿಂದ ರಾತ್ರಿ 9 ರವರೆಗೆ, ವಾರಕ್ಕೆ 6 ದಿನ) ಎಂಬ ಕಠಿಣ ಕೆಲಸದ ಸಂಸ್ಕೃತಿಯಿದೆ. ಇದರಿಂದ ಯುವಕರು ತೀವ್ರ ಮಾನಸಿಕ ಒತ್ತಡ ಮತ್ತು ಆಯಾಸಕ್ಕೆ ಒಳಗಾಗುತ್ತಿದ್ದಾರೆ.
ದಿನೇ ದಿನೇ ಹೆಚ್ಚುತ್ತಿರುವ ನಿರುದ್ಯೋಗ ಮತ್ತು ಆಫೀಸುಗಳಲ್ಲಿನ ತೀವ್ರ ಸ್ಪರ್ಧೆಯಿಂದಾಗಿ ಯುವಕರ ಜೀವನ ಯಾಂತ್ರಿಕವಾಗಿಬಿಟ್ಟಿದೆ. ಈ ಮಾನಸಿಕ ನೆಮ್ಮದಿಯಿಲ್ಲದ ಜೀವನದಿಂದ ಮುಕ್ತಿ ಪಡೆಯಲು ಅವರು ಪ್ರಕೃತಿಯತ್ತ ಆಕರ್ಷಿತರಾಗುತ್ತಿದ್ದಾರೆ.
ಆಕರ್ಷಕ ವೇತನ: ಚೀನಾದ ಇನ್ನರ್ಮಂ ಗೋಲಿಯಾ, ಕ್ಸಿನ್ಜಿಯಾಂಗ್ನಂತಹ ಗ್ರಾಮೀಣ, ಹಸಿರು ಹುಲ್ಲುಗಾವಲು ಪ್ರದೇಶಗಳಲ್ಲಿ ಕುರಿಗಳು ಮತ್ತು ದನಗಳನ್ನು ಕಾಯುವವರ ಕೊರತೆ ತೀವ್ರವಾಗಿದೆ. ಇದನ್ನು ಭರ್ತಿ ಮಾಡಲು ಅಲ್ಲಿನ ಫಾರ್ಮ್ ಮಾಲೀಕರು ಭಾರಿ ವೇತನ ನೀಡುತ್ತಿದ್ದಾರೆ.
ಈ ಕುರಿ ಕಾಯುವ ಉದ್ಯೋಗಕ್ಕೆ ತಿಂಗಳಿಗೆ ಸುಮಾರು 10,000 ದಿಂದ 15,000 ಯುವಾನ್ (ಭಾರತೀಯ ಕರೆನ್ಸಿಯಲ್ಲಿ ಸುಮಾರು ₹1.15 ಲಕ್ಷದಿಂದ ₹1.72 ಲಕ್ಷದವರೆಗೆ) ವೇತನ ನೀಡಲಾಗುತ್ತಿದೆ. ನಗರಗಳ ಐಟಿ ಕಂಪನಿಗಳು ನೀಡುವ ಆರಂಭಿಕ ವೇತನಕ್ಕಿಂತ ಇದು ಬಹಳ ಹೆಚ್ಚು.
ಈ ಉದ್ಯೋಗಕ್ಕೆ ಸೇರಿದ ಯುವಕರು ತಮ್ಮ ಅನುಭವಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. “ಇಲ್ಲಿ ಬಾಸ್ ಗಳ ಕಿರುಕುಳವಿಲ್ಲ, ಲ್ಯಾಪ್ಟಾಪ್ ಸ್ಕ್ರೀನ್ ನೋಡುವ ಅಗತ್ಯವಿಲ್ಲ, ಡೆಡ್ಲೈನ್ಗಳ ತಲೆನೋವಿಲ್ಲ. ಬೆಳಗ್ಗೆ ಬೇಗ ಎದ್ದು ಹಸಿರು ಬಯಲಿನಲ್ಲಿ ಕುರಿಗಳನ್ನು ಮೇಯಿಸುವುದರಿಂದ ಮನಸ್ಸಿಗೆ ಎಲ್ಲಿಲ್ಲದ ನೆಮ್ಮದಿ ಸಿಗುತ್ತಿದೆ” ಎಂದು ಅವರು ಹೇಳುತ್ತಿದ್ದಾರೆ.
ಜೀವನಶೈಲಿಯ ಬದಲಾವಣೆ: ಒಂದು ಕಾಲದಲ್ಲಿ ಕುರಿ ಕಾಯುವುದನ್ನು ಕೀಳು ಕೆಲಸ ಎಂದು ಭಾವಿಸಲಾಗಿತ್ತು. ಆದರೆ ಇಂದು ಚೀನಾದ ಯುವಕರ ಪಾಲಿಗೆ ಇದು ಕೇವಲ ಉದ್ಯೋಗ ಮಾರ್ಗ ಮಾತ್ರವಲ್ಲ, ನಗರದ ಮಾಲಿನ್ಯ ಮತ್ತು ಕಾರ್ಪೊರೇಟ್ ಒತ್ತಡಗಳಿಂದ ದೂರವಿರುವ ಒಂದು ನೆಮ್ಮದಿಯ ಜೀವನಶೈಲಿಯಾಗಿದೆ.
ಈ ಟ್ರೆಂಡ್ ನೋಡುತ್ತಿದ್ದರೆ, ಮುಂದಿನ ದಿನಗಳಲ್ಲಿ ಯುವಕರು ತಮ್ಮ ವೃತ್ತಿ ಆಯ್ಕೆಯಲ್ಲಿ ಮಾನಸಿಕ ಆರೋಗ್ಯಕ್ಕೆ ಎಷ್ಟು ಪ್ರಾಮುಖ್ಯತೆ ನೀಡಲಿದ್ದಾರೆ ಎಂಬುದು ಸ್ಪಷ್ಟವಾಗುತ್ತಿದೆ.
