ಶ್ರೀ ಹರಿಕೋಟಾ: ಭಾರತದ ಖಾಸಗಿ ಬಾಹ್ಯಾಕಾಶ ಕ್ಷೇತ್ರ ಇಂದು ಒಂದು ಐತಿಹಾಸಿಕ ಮೈಲಿಗಲ್ಲಿಗೆ ಸಾಕ್ಷಿಯಾಗುತ್ತಿದೆ. ದೇಶದ ಮೊದಲ ಖಾಸಗಿ ಆರ್ಬಿಟಲ್ ರಾಕೆಟ್ ಆದ 'ವಿಕ್ರಮ್-1' (Vikram 1) ಶನಿವಾರ ಬೆಳಗ್ಗೆ 11.30 ಕ್ಕೆ ಆಂಧ್ರಪ್ರದೇಶದ ಶ್ರೀಹರಿಕೋಟಾದಲ್ಲಿರುವ (Srihari kota) ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದ ಮೊದಲ ಉಡಾವಣಾ ವೇದಿಕೆಯಿಂದ ಆಕಾಶಕ್ಕೆ ಜಿಗಿಯಲು ಸಜ್ಜಾಗಿದೆ.
ಹೈದರಾಬಾದ್ ಮೂಲದ ಸ್ಕೈರೂಟ್ ಏರೋಸ್ಪೇಸ್ ಸಂಸ್ಥೆ (Skyroot aerospace) ಅಭಿವೃದ್ಧಿಪಡಿಸಿರುವ ಈ ರಾಕೆಟ್ ಉಡಾವಣೆ, ಭಾರತೀಯ ವಾಣಿಜ್ಯ ಬಾಹ್ಯಾಕಾಶ ರಂಗದಲ್ಲಿ ಹೊಸ ಕ್ರಾಂತಿಗೆ ನಾಂದಿ ಹಾಡಲಿದೆ.
ಏಳು ಅಂತಸ್ತುಗಳ ಎತ್ತರವಿರುವ ವಿಕ್ರಮ್-1 ರಾಕೆಟ್ ಸಂಪೂರ್ಣವಾಗಿ ಇಂಗಾಲದ ಸಂಯೋಜಿತ (ಆಲ್-ಕಾರ್ಬನ್ ಕಾಂಪೋಸಿಟ್) ತಂತ್ರಜ್ಞಾನದಿಂದ ನಿರ್ಮಾಣವಾಗಿದೆ.
ಕೇವಲ 250 ಕೆಜಿವರೆಗಿನ ಸಣ್ಣ ಉಪಗ್ರಹಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿರುವ ಈ ಮಲ್ಟಿ-ಸ್ಟೇಜ್ ರಾಕೆಟ್, ಭೂಮಿಯಿಂದ 450 ಕಿಲೋಮೀಟರ್ ಎತ್ತರದ ಕೆಳ ಭೂ ಕಕ್ಷೆಯನ್ನು (ಲೋ ಅರ್ಥ್ ಆರ್ಬಿಟ್) ತಲುಪುವ ಗುರಿ ಹೊಂದಿದೆ.
ಸ್ಕೈರೂಟ್ ಸಂಸ್ಥೆಯ ಸುಮಾರು ಒಂದು ಸಾವಿರ ನುರಿತ ಸಿಬ್ಬಂದಿ ಹಾಗೂ ದೇಶದ 400ಕ್ಕೂ ಹೆಚ್ಚು ಸ್ಥಳೀಯ ಬಿಡಿಭಾಗಗಳ ಪೂರೈಕೆದಾರರ ಸಹಯೋಗದಲ್ಲಿ, ಸುಮಾರು 3,000 ದಿನಗಳ ಕಠಿಣ ಪರಿಶ್ರಮದ ಬಳಿಕ ಈ ರಾಕೆಟ್ ಸಿದ್ಧಗೊಂಡಿದೆ.
ಸಂಪೂರ್ಣ ಸ್ವದೇಶಿ ತಂತ್ರಜ್ಞಾನ ಬಳಸಿ ತಯಾರಿಸಲಾದ ಈ ರಾಕೆಟ್ನಲ್ಲಿ 3D ಪ್ರಿಂಟೆಡ್ ಇಂಜಿನ್ಗಳು ಮತ್ತು ಗರಿಷ್ಠ ತಳ್ಳುಬಲ ನೀಡುವ ಘನ ಇಂಧನದ ಬೂಸ್ಟರ್ಗಳನ್ನು ಬಳಸಲಾಗಿದೆ.
ಈ ಮಹತ್ವದ 'ಆಗಮನ್' ಅಭಿಯಾನದಲ್ಲಿ ವಿಕ್ರಮ್-1 ರಾಕೆಟ್ ಒಟ್ಟು ನಾಲ್ಕು ಪ್ರಮುಖ ತಂತ್ರಜ್ಞಾನ ಪ್ರದರ್ಶನ ಉಪಗ್ರಹಗಳನ್ನು (ಪೇಲೋಡ್ಸ್) ಕಕ್ಷೆಗೆ ಸೇರಿಸಲಿದೆ.
ಇವುಗಳಲ್ಲಿ ಬೆಂಗಳೂರಿನ ಗ್ರಹಾ ಸ್ಪೇಸ್ ಸಂಸ್ಥೆಯ 'ಸೋಲಾರಸ್ ಎಸ್3' ಉಪಗ್ರಹ, ಹೈದರಾಬಾದ್ನ ಕಾಸ್ಮೋಸರ್ವ್ ಸ್ಪೇಸ್ ಸಂಸ್ಥೆ ಅಭಿವೃದ್ಧಿಪಡಿಸಿರುವ ಬಾಹ್ಯಾಕಾಶದ ಕಸವನ್ನು ಸ್ವಚ್ಛಗೊಳಿಸುವ 'ಎಂಬ್ರೇಸ್' ಹೆಸರಿನ ರೋಬೋಟಿಕ್ ಕೈ (ರೋಬೋಟಿಕ್ ಆರ್ಮ್), ಸ್ಕೈರೂಟ್ ಸಂಸ್ಥೆಯದ್ದೇ ಆದ 'ಸ್ಕೋಪ್' ಉಪಗ್ರಹ ಹಾಗೂ ಜರ್ಮನಿಯ ನ್ಯೂಸ್ಪೇಸ್ ಹಾರ್ಡ್ವೇರ್ ಸಂಸ್ಥೆಯಾದ ಡಿಕ್ಯೂಬ್ಡ್ನ ಇನ್-ಆರ್ಬಿಟ್ ತಂತ್ರಜ್ಞಾನ ಉಪಗ್ರಹಗಳು ಸೇರಿವೆ.
