ಬೆಂಗಳೂರಿನಲ್ಲಿ ನಟ ದರ್ಶನ್‌ ಅವರ ಪರಮಾಪ್ತ ನಟ ಧನ್ವೀರ್‌ ಹಾಗೂ ದರ್ಶನ್‌ ಪತ್ನಿ ವಿಜಯಲಕ್ಷ್ಮಿ ನಡುವಿನ ಆಂತರಿಕ ಭಿನ್ನಾಭಿಪ್ರಾಯವು ತಾರಕಕ್ಕೇರಿದ್ದು, ವಿವಾದವು ಅಧಿಕೃತವಾಗಿ ಪೊಲೀಸ್‌ ಠಾಣೆ ಮೆಟ್ಟಿಲೇರಿದೆ.
ಧನ್ವೀರ್‌ ವಿರುದ್ಧ ವಿಜಯಲಕ್ಷ್ಮಿ ಅವರ ಮ್ಯಾನೇಜರ್‌ ನಾಗರಾಜ್‌ ದೂರು ದಾಖಲಿಸಿದ ಬೆನ್ನಲ್ಲೇ, ತಿರುಗೇಟು ನೀಡಿರುವ ಧನ್ವೀರ್‌ ತಂದೆ ತಿಮ್ಮೇಗೌಡ ಅವರು ವಿಜಯಲಕ್ಷ್ಮಿ ಹಾಗೂ ಅವರ ತಂಡದ ವಿರುದ್ಧ ರಾಜಾಜಿನಗರ ಪೊಲೀಸ್‌ ಠಾಣೆಯಲ್ಲಿ ಗಂಭೀರ ಆರೋಪಗಳೊಂದಿಗೆ ಪ್ರತಿದೂರು ದಾಖಲಿಸಿದ್ದಾರೆ.
ರಿಯಲ್‌ ಎಸ್ಟೇಟ್‌ ಉದ್ಯಮಿ ಹಾಗೂ ನಿರ್ಮಾಪಕರಾದ ತಿಮ್ಮೇಗೌಡರ ದೂರಿನನ್ವಯ, ಅಕ್ಟೋಬರ್‌ 21ರಂದು ರಾತ್ರಿ ಧನ್ವೀರ್‌ ಮನೆಯಲ್ಲಿ ಇಲ್ಲದ ವೇಳೆ ವಿಜಯಲಕ್ಷ್ಮಿ ಹಾಗೂ ಮ್ಯಾನೇಜರ್‌ ನಾಗರಾಜ್‌ ಏಕಾಏಕಿ ಮನೆಗೆ ನುಗ್ಗಿದ್ದಾರೆ.
ಬಾಗಿಲು ತೆರೆದ ಧನ್ವೀರ್‌ ತಾಯಿ ಭಾರತಿ ಅವರ ಬಳಿ ಏರುಧ್ವನಿಯಲ್ಲಿ ಧನ್ವೀರ್‌ ಮತ್ತು ಅವರ ತಂದೆಯ ಬಗ್ಗೆ ವಿಚಾರಿಸಿ ಗಲಾಟೆ ಮಾಡಿದ್ದಾರೆ. ಈ ವೇಳೆ ಸ್ಥಳಕ್ಕೆ ಬಂದ ಧನ್ವೀರ್‌ ಸಂಬಂಧಿ ಅಜಯ್‌ ಗೌಡ ಅವರೊಂದಿಗೆ ವಾಗ್ವಾದ ನಡೆಸಿ, ಪರಿಸ್ಥಿತಿ ವಿಕೋಪಕ್ಕೆ ತಿರುಗಿದೆ.
ಅಲ್ಲದೆ, ವಿಜಯಲಕ್ಷ್ಮಿ ಅವರ ಸೂಚನೆಯಂತೆ ನಾಗರಾಜ್‌ ಕರೆ ಮಾಡಿದ ಹಿನ್ನೆಲೆಯಲ್ಲಿ ಭೋಜ ಹಾಗೂ 'ಬಾಟಲಿ' ಪ್ರಮೋದ್‌ ಸ್ಥಳಕ್ಕೆ ಆಗಮಿಸಿದ್ದು, ತಾವು ವಿಜಯಲಕ್ಷ್ಮಿ ಅವರ ತಮ್ಮನೆಂದು ಹೇಳಿಕೊಂಡು ಧನ್ವೀರ್‌ ಕುಟುಂಬದವರಿಗೆ ಧಮ್ಕಿ ಹಾಕಿದ್ದಾರೆ.
ಧನ್ವೀರ್‌ ಅವರನ್ನು ಎಲ್ಲಿಗೆ ಕರೆಸಿ ಏನು ಮಾಡಬೇಕೆಂದು ನಮಗೆ ಚೆನ್ನಾಗಿ ಗೊತ್ತಿದೆ ಎಂದು ಕೊಲೆ ಬೆದರಿಕೆ ಹಾಕಿದ್ದಾರೆ ಎನ್ನಲಾಗಿದೆ. ತಿಮ್ಮೇಗೌಡರು ಪೊಲೀಸರಿಗೆ ಕರೆ ಮಾಡಲು ಮುಂದಾಗುತ್ತಿದ್ದಂತೆ ಇಡೀ ತಂಡ ಅಲ್ಲಿಂದ ತೆರಳಿದೆ.
ಇದಕ್ಕೂ ಮುನ್ನ ನಟ ಧನ್ವೀರ್‌ ತಮಗೆ ಫೋನ್‌ ಮಾಡಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕಿದ್ದಾರೆ ಎಂದು ಆರೋಪಿಸಿ ಮ್ಯಾನೇಜರ್‌ ನಾಗರಾಜ್‌ ರಾಜರಾಜೇಶ್ವರಿ ನಗರ ಪೊಲೀಸ್‌ ಠಾಣೆಗೆ ದೂರು ನೀಡಿ ಆಡಿಯೊ ಕ್ಲಿಪ್‌ಗಳನ್ನು ಒಪ್ಪಿಸಿದ್ದರು. ಸದ್ಯ ತಿಮ್ಮೇಗೌಡರ ಈ ಗಂಭೀರ ದೂರಿನ ಸಂಬಂಧ ರಾಜಾಜಿನಗರ ಠಾಣೆ ಪೊಲೀಸರು ಅಸಂಜ್ಞೆಯ ಪ್ರಕರಣ (ಎನ್‌ಸಿಆರ್) ದಾಖಲಿಸಿಕೊಂಡು ತನಿಖೆ ಮುಂದುವರೆಸಿದ್ದಾರೆ.
